نئی دہلی، 16 اکتوبر (ہ س)۔ سپریم کورٹ حاملہ صحافی رچا پراشر کی اس عرضی پر سماعت کرے گا، جس میں انہوں نے الزام لگایا ہے کہ 12 اکتوبر کو اپوزیشن کے مارچ کے دوران کانگریس رہنما راہل گاندھی نے سپریم کورٹ کی رجسٹری کے اندر انہیں دھکا دیا ۔ جمعہ کو حاملہ صحافی کی جانب سے سینئر وکیل گورو بھاٹیا نے چیف جسٹس کی سربراہی والی بنچ کے سامنے معاملہ پیش کرتے ہوئے جلد سماعت کی درخواست کی، جس کے بعد عدالت نے 26 اکتوبر کو سماعت کرنے کا حکم دیا۔

جب گورو بھاٹیا نے اس بارے میں غیر یقینی صورتحال ظاہر کی کہ آیا اس معاملے میں نوٹس جاری کیا گیا ہے یا نہیں، جس کا ذکر انہوں نے جمعرات کو عدالت کے سامنے کیا تھا، تو چیف جسٹس نے کہا کہ تمام معاملات میں نوٹس جاری کر دیے گئے ہیں۔

یہ معاملہ 12 اکتوبر کو اپوزیشن رہنماوں کے اس مارچ سے متعلق ہے، جو خصوصی جامع نظرثانی (ایس آئی آر) کو چیلنج کرتے ہوئے عرضی دائر کرنے کے لیے سپریم کورٹ تک نکالا گیا تھا۔یہ مارچ ایسے احتجاجی مظاہروں کے درمیان نکالا گیا تھا، جن میں ووٹر فہرستوں کی نظرثانی کے عمل میں مبینہ بے ضابطگیوں کے خلاف چیف الیکشن کمشنر گیانیش کمار کے استعفے کا مطالبہ کیا جا رہا تھا۔

صحافی رچا پراشر نے الزام لگایا کہ جب وہ اس مارچ کی کوریج کرنے کی کوشش کر رہی تھیں، تو راہل گاندھی نے انہیں پکڑ کر اپنی طرف کھینچا۔ اس کے بعد ان کے حفاظتی عملے نے انہیں دھکا دیا، جس سے وہ گر گئیں۔ بعد میں انہیں اسپتال میں داخل کرانا پڑا۔ کانگریس پارٹی نے ان کے اس دعوے کی تردید کی ہے۔

ہندوتھان سماچار

ہندوستان سماچار / محمد شہزاد