رضا اکیڈمی کے صدر الحاج محمد سعید نوری نے پائیدھونی پولیس اسٹیشن میں تحریری شکایت پیش کی

ممبئی،15اکتوبر (ہ س )۔

رضا اکیڈمی نے نبی کریم حضرت محمد مصطفیٰ کے مقدس نام سے متعلق سوشل میڈیا پر گردش کرنے والی ایک متنازعہ ویڈیو کے معاملے میں پائیدھونی پولیس اسٹیشن کے سینئر پولیس انسپکٹر لکشمی کانت سالونکھے کو تحریری شکایت پیش کرتے ہوئے معاملے کی جانچ اور مناسب کارروائی کا مطالبہ کیا ہے۔

رضا اکیڈمی کے صدر الحاج محمد سعید نوری کی جانب سے پیش کی گئی شکایت میں کہا گیا ہے کہ مذکورہ ویڈیو میں مبینہ طور پر اداکار ارجن بجلانی کی اہلیہ نیہا سوامی ایک تقریب کے دوران ایسی ٹی شرٹ پہنے نظر آ رہی ہیں، جس پر نبی کریم حضرت محمد مصطفیٰ کا مقدس نام درج ہے۔ ویڈیو کے سوشل میڈیا پر گردش کرنے سے مسلم معاشرے میں تشویش پائی جا رہی ہے اور مذہبی جذبات مجروح ہونے کا اندیشہ ظاہر کیا گیا ہے۔

شکایت میں کہا گیا ہے کہ نبی کریم کا اسمِ مبارک مسلمانوں کے لیے انتہائی مقدس اور قابلِ احترام ہے، اس لیے اس معاملے کو مذہبی جذبات کی حساسیت کو مدنظر رکھتے ہوئے سنجیدگی سے دیکھا جانا چاہیے۔

رضا اکیڈمی نے پولیس سے مطالبہ کیا ہے کہ ویڈیو کا جائزہ لے کر مناسب جانچ کی جائے اور اگر متعلقہ پلیٹ فارم کے ضوابط کی خلاف ورزی ثابت ہو تو ویڈیو ہٹانے سمیت ضروری اقدامات کیے جائیں۔ اس کے علاوہ متعلقہ ٹی شرٹ تیار کرنے والی کمپنی کی شناخت کرکے اس سے وضاحت طلب کرنے اور مستقبل میں مقدس ناموں کے احترام کو یقینی بنانے کے لیے مناسب احتیاطی تدابیر اختیار کرنے کی بھی درخواست کی گئی ہے۔

الحاج محمد سعید نوری نے امید ظاہر کی کہ پولیس اس معاملے کو سنجیدگی سے لیتے ہوئے متعلقہ ضوابط کے مطابق ضروری کارروائی کرے گی اور شکایت پر کیے گئے اقدامات سے رضا اکیڈمی کو آگاہ کرے گی۔

ہندوستھان سماچار

ہندوستان سماچار / عطاءاللہ