علی گڑھ, یکم اکتوبر (ہ س)۔

تالا اور تعلیم کے شہر کے طور پر اپنی شناخت رکھنے والے علی گڑھ کو ایک نئی پہچان ملنے جا رہی ہے۔ اتر پردیش حکومت نے وزیر اعلیٰ عالمی نگروُدَے یوجنا کے تحت علی گڑھ میونسپل کارپوریشن میں لاک میوزیم اور اربن کلچرل سینٹر کے قیام کے لیے مجموعی طور پر 37 کروڑ روپے کی انتظامی و مالی منظوری دے دی ہے۔ منصوبے کی پہلی قسط کے طور پر 35 فیصد رقم یعنی 10 کروڑ 23 لاکھ 83 ہزار 144 روپے جاری کرنے کی بھی منظوری دی گئی ہے۔

میونسپل کمشنر پریم پرکاش مینا نے جمعرات کو سول انجینئر اور اربن پلانر کی ٹیم کے ہمراہ مجوزہ مقام کا معائنہ کیا۔ یہ مقام جواہر بھون کے سامنے راجا مہندر پرتاپ پارک کے قریب واقع ہے۔ انہوں نے متعلقہ افسران کو منصوبے پر مزید کارروائی فوری طور پر شروع کرنے کی ہدایت دی۔

میونسپل کمشنر نے بتایا کہ گزشتہ سال جون 2025 میں میئر پرشانت سنگھل، اس وقت کی منڈل کمشنر سنگیتا سنگھ اور میونسپل کمشنر کی مشترکہ کوششوں سے لاک میوزیم کا منصوبہ تیار کرکے حکومت کو بھیجا گیا تھا۔ حکومت نے منصوبے کی اہمیت کو دیکھتے ہوئے اسے منظوری دی ہے۔

حکومت کی جانب سے جاری حکم نامے کے مطابق مالی سال 2026-27 میں علی گڑھ میونسپل کارپوریشن کے لیے لاک میوزیم اور اربن کلچرل سینٹر کی تعمیر پر 37 کروڑ روپے خرچ کیے جائیں گے۔ منصوبے کی تعمیر مقررہ تکنیکی معیار، معیارِ تعمیر اور مالی ضوابط کے مطابق کرائی جائے گی۔

میونسپل کمشنر نے کہا کہ لاک میوزیم علی گڑھ کی تقریباً سو سالہ تالا سازی کی تاریخ اور روایتی صنعت کو جدید انداز میں ملک و دنیا کے سامنے پیش کرنے کا ذریعہ بنے گا۔ انہوں نے کہا کہ اس منصوبے سے علی گڑھ کی تالا صنعت کو نئی شناخت ملنے کے ساتھ صنعت، روزگار اور سیاحت کے مواقع میں بھی اضافہ ہو سکتا ہے۔

انہوں نے بتایا کہ منصوبے کی تفصیلی پروجیکٹ رپورٹ تجربہ کار مشیر سے تیار کرائی جائے گی۔ بہترین ڈیزائن منتخب کرکے حکومت کو منظوری کے لیے بھیجا جائے گا۔ حکومتی منظوری کے بعد تعمیراتی کارروائی آگے بڑھائی جائے گی۔ ان کے مطابق آئندہ چھ سے سات ماہ میں لاک میوزیم کی تعمیر شروع ہونے کی توقع ہے۔

میوزیم میں جدید اور تاریخی گیلریاں قائم ہوں گی

مجوزہ لاک میوزیم میں منفرد کی ہول داخلی دروازہ، وسیع لاک مجسمہ، ڈیجیٹل اورینٹیشن ڈوم، قدیم تالا سازی کی ورکشاپ کا نمونہ، نوآبادیاتی دور میں تجارت و برآمدات کی نمائش، مکینیکل میورل، میڈیا ٹنل اور جدید ٹیکنالوجی سے متعلق انٹرایکٹو گیلریاں قائم کی جائیں گی۔

میوزیم میں اسمارٹ لاک، بایومیٹرک، چہرے کی شناخت اور سائبر سکیورٹی سے متعلق جدید ٹیکنالوجی بھی دکھائی جائے گی۔ اس کے علاوہ علی گڑھ کے روایتی کاریگروں کی میراث، ان کی زندگی، لوک کہانیوں، ہندوستانی سنیما اور ثقافتی روایات پر مبنی خصوصی گیلریاں بھی تیار کی جائیں گی۔

بچوں کے لیے خصوصی کڈز زون، کی اینگریونگ اسٹیشن، کائنیٹک لاک اسکلپچر، وش وال، تھیم پر مبنی کیفے و ریسٹورنٹ اور مختلف ڈیجیٹل و تفریحی سرگرمیوں کا بھی انتظام ہوگا۔ میوزیم کو تاریخ، ورثے، فن، ٹیکنالوجی، تعلیم، تفریح اور سیاحت کے مشترکہ مرکز کے طور پر تیار کرنے کا منصوبہ ہے۔

سابق کمشنر سمیت عوامی نمائندوں نے خیرمقدم کیا

رکن پارلیمنٹ ستیش گوتم نے لاک میوزیم کی منظوری کو علی گڑھ کے لیے اہم قدم قرار دیتے ہوئے کہا کہ اس منصوبے کے ذریعے شہر کی صنعتی میراث کو جدید انداز میں محفوظ کرکے ملک و دنیا کے سامنے پیش کیا جا سکے گا۔

میئر پرشانت سنگھل نے منصوبے کی منظوری پر ریاستی حکومت کا شکریہ ادا کرتے ہوئے کہا کہ لاک میوزیم علی گڑھ کی صنعت کو نئی سمت دینے میں معاون ثابت ہوگا۔ ان کے مطابق میوزیم کے ذریعے بیرونِ ملک اور ملک کے مختلف حصوں سے آنے والے افراد، تاجر اور طلبہ علی گڑھ کی تالا سازی کی تاریخ اور مختلف مراحل سے واقف ہو سکیں گے۔

کول کے رکن اسمبلی انل پاراشَر نے کہا کہ عالمی معیار کے لاک میوزیم کا قیام علی گڑھ کی تاریخی، صنعتی اور ثقافتی میراث کو محفوظ کرنے کی جانب اہم قدم ہے۔ ان کے مطابق اس سے روایتی تالا صنعت کو جدید انداز میں نئی شناخت ملے گی۔

سابق منڈل کمشنر سنگیتا سنگھ نے میونسپل کمشنر کو مبارکباد دیتے ہوئے کہا کہ گزشتہ ایک سال سے جاری مسلسل کوششوں کا نتیجہ سامنے آنا خوش آئند ہے۔ انہوں نے کہا کہ علی گڑھ میں قائم ہونے والا یہ میوزیم نوجوانوں کے لیے روزگار کے نئے مواقع پیدا کرنے اور شہر کو ملک و بیرونِ ملک نئی شناخت دینے میں معاون ثابت ہو سکتا ہے۔

---------------

ہندوستان سماچار / سید کامران علی گڑھ