شروعاتی کاروبار میں نچلی سطح سے خریداری سے شیئر بازار سنبھلا، سینسیکس اور نفٹی میں بحالی

نئی دہلی، 09 جنوری (ہ س)۔ گھریلو شیئر مارکیٹ میں آج ابتدائی کاروبار کے دوران نچلی سطح سے ریکوری کا رخ بنتا ہوا نظر آ رہا ہے۔ آج کے کاروبار کی شروعات گراوٹ کے ساتھ ہوئی تھی۔ مارکیٹ کھلتے ہی خریداری شروع ہونے کے سبب سینسیکس اور نفٹی دونوں انڈیکس نے چھلانگ لگا کر سبز نشان میں اپنی جگہ بنا لی۔ حالانکہ تھوڑی دیر بعد منافع وصولی شروع ہو گئی، جس کے سبب ان دونوں انڈیکس نے دوبارہ سرخ نشان میں غوطہ لگا دیا۔ مارکیٹ میں پہلے آدھے گھنٹے تک مسلسل دباو بنا رہا، لیکن اس کے بعد خریداروں نے ایک بار پھر خریداری کا زور بنادیا، جس سے ان دونوں انڈیکس کی حالت میں سدھار ہونے لگا۔ پہلے ایک گھنٹے کا کاروبار ہونے کے بعد سینسیکس اور نفٹی 0.07 فیصد کی کمزوری کے ساتھ کاروبار کر رہے تھے۔

ابتدائی ایک گھنٹے کا کاروبار ہونے کے بعد شیئر مارکیٹ کے سرکردہ شیئروں میں سے ایٹرنل، او این جی سی، ایچ سی ایل ٹیکنالوجی، ٹیک مہندرا اور پاور گرڈ کارپوریشن کے شیئر 3.12 فیصد سے لے کر 1.16 فیصد کی مضبوطی کے ساتھ کاروبار کر رہے تھے۔ دوسری جانب، اڈانی انٹرپرائزیز، آئی سی آئی سی آئی بینک، اڈانی پورٹس، شری رام فائنانس اور این ٹی پی سی کے شیئر 1.39 فیصد سے لے کر 0.90 فیصد کی گراوٹ کے ساتھ کاروبار کرتے ہوئے نظر آ رہے تھے۔

ابھی تک کے کاروبار میں شیئر مارکیٹ میں 2,613 شیئروں میں ایکٹیو ٹریڈنگ ہو رہی تھی۔ ان میں سے 1,214 شیئر منافع کما کر سبز نشان میں کاروبار کر رہے تھے، جبکہ 1,399 شیئر نقصان اٹھا کر سرخ نشان میں کاروبار کر رہے تھے۔ اسی طرح سینسیکس میں شامل 30 شیئروں میں سے 16 شیئر خریداری کی حمایت سے سبز نشان میں برقرار تھے۔ دوسری جانب 14 شیئر فروخت کے دباو میں سرخ نشان میں کاروبار کر رہے تھے۔ جبکہ نفٹی میں شامل 50 شیئروں میں سے 26 شیئر سبز نشان میں اور 24 شیئر سرخ نشان میں کاروبار کرتے نظر آ رہے تھے۔

بی ایس ای کا سینسیکس آج 158.87 پوائنٹس کی کمزوری کے ساتھ 84,022.09 پوائنٹس کی سطح پر کھلا۔ کاروبار کی شروعات ہوتے ہی خریداری کی حمایت سے پہلے 5 منٹ میں ہی یہ انڈیکس اوپننگ لیول سے تقریباً 400 پوائنٹس کی چھلانگ لگا کر 84,406.22 پوائنٹس تک پہنچ گیا۔ حالانکہ یہ تیزی برقرار نہیں سکی۔ تھوڑی دیر بعد ہی فروخت کا دباو بن گیا، جس کی وجہ سے پہلے آدھے گھنٹے کے کاروبار میں ہی یہ انڈیکس سرخ نشان میں 84,019.50 پوائنٹس کی سطح تک گر گیا۔ اس کے بعد خریداروں نے ایک بار پھر خریداری کا زور بنایا، جس سے اس انڈیکس کی حالت میں سدھار ہوتا ہوا نظر آنے لگا۔ مارکیٹ میں مسلسل جاری خرید و فروخت کے درمیان پہلے 1 گھنٹے کا کاروبار ہونے کے بعد صبح 10.15 بجے سینسیکس 60.32 پوائنٹس کی کمزوری کے ساتھ 84,120.64 پوائنٹس کی سطح پر کاروبار کر رہا تھا۔

سینسیکس کی طرح ہی این ایس ای کے نفٹی نے آج 36.45 پوائنٹس ٹوٹ کر 25,840.40 پوائنٹس کی سطح سے کاروبار کی شروعات کی۔ مارکیٹ کھلتے ہی خریداری شروع ہونے کے سبب تھوڑی دیر میں ہی یہ انڈیکس اوپننگ لیول سے 100 پوائنٹس سے زیادہ اچھل کر 25,940.60 پوائنٹس تک پہنچ گیا۔ حالانکہ پہلے 5 منٹ کے بعد ہی مارکیٹ میں منافع وصولی شروع ہو گئی، جس کی وجہ سے یہ انڈیکس دوبارہ سرخ نشان میں گر گیا۔ فروخت کے دباو کے سبب پہلے آدھے گھنٹے کے کاروبار میں نفٹی گر کر 25,818.35 پوائنٹس کی سطح تک پہنچا۔ اس کمزوری کے بعد ایک بار پھر خریداروں نے زور بنایا، جس سے اس انڈیکس کی حالت میں سدھار ہونے لگا۔ مارکیٹ میں مسلسل جاری خرید و فروخت کے درمیان ابتدائی 1 گھنٹے کا کاروبار ہونے کے بعد صبح 10.15 بجے نفٹی 18.40 پوائنٹس کی گراوٹ کے ساتھ 25,858.45 پوائنٹس کی سطح پر کاروبار کر رہا تھا۔

ہندوستھان سماچار

---------------

ہندوستان سماچار / انظر حسن