مدھیہ پردیش خاتون کانگریس نے اندور آلودہ پانی معاملے میں حکومت پر لیپا پوتی کا الزام عائد کیا، کہا- حکومت ملزمان کو بچا رہی ہے

بھوپال، 02 جنوری (ہ س)۔ مدھیہ پردیش خاتون کانگریس کی صدر رینا بوراسی سیتیا نے اندور کے بھاگیرتھ پورا سانحہ میں ریاستی حکومت کی جانب سے اٹھائے گئے قدموں کو لیپا پوتی بتایا ہے۔ انہوں نے الزام لگاتے ہوئے کہا کہ 15 لوگوں کی موت کے معاملے میں حکومت ملزمان کو بچانے میں لگ گئی ہے۔ لوک سبھا میں اپوزیشن لیڈر راہل گاندھی کی جانب سے ایکس پر پوسٹ کیے جانے کے بعد حکومت نے کارروائی کرنے کا دکھاوا کیا ہے۔ اس حکومت نے اپنے ہی محکمانہ وزیر اور شہر کے میئر کی مانگ پر کوئی کارروائی نہیں کی۔

رینا بوراسی نے جمعہ کو جاری ایک بیان میں کہا کہ مدھیہ پردیش کے وزیر اعلیٰ ڈاکٹر موہن یادو کی جانب سے ٹویٹ کر یہ کہا جانا کہ پانی کے انتظام کے انچارج ایڈیشنل کمشنر کو ہٹانے کی ہدایت دی گئی ہے۔ اس کے ساتھ ہی پانی کے سپرنٹنڈنٹ انجینئر کا محکمہ بدلنے کی ہدایت دی گئی ہے۔ یہ پورے سسٹم کے لیے توہین آمیز حکم ہے۔ 15 لوگوں کی موت کی ذمہ داری کے تعین میں صرف ایک افسر کا تبادلہ کرنے کا کام کیا جا رہا ہے۔ تبادلہ تو ایک انتظامی عمل کا حصہ ہے یہ کوئی سزا نہیں ہے۔

انہوں نے کہا کہ ریاست کی سابق وزیر اعلیٰ اوما بھارتی کی جانب سے حکومت کو جو صلاح دی گئی ہے وہ حکومت کو مان لینی چاہیے۔ اندور کے نام کو پورے ملک میں بدنام کرنے والےاس واقعے کے ملزمان کو ایسی سزا ملنی چاہیے جو کہ پورے ملک میں نظیر بن سکے۔ اس معاملے میں ریاست کی ڈاکٹر موہن یادو کی قیادت والی حکومت کی جانب سے جو کارروائی کی جا رہی ہے وہ افسران میں یہ پیغام دے گی کہ کتنی بھی بڑی لاپرواہی کر لو، کوئی فرق نہیں پڑتا ہے۔ یہ حکومت بہت زیادہ ہونے پر صرف تبادلہ کرتی ہے۔ خاتون کانگریس صدر رینا بوراسی نے کہا کہ اس واقعے میں جو لاپرواہی کی گئی ہے اس کی کوئی حد نہیں ہے۔ ایسی لاپرواہی کے لیے ذمہ دار افسر کو سخت سے سخت سزا دی جانی چاہیے جس سے دیگر لوگوں میں یہ پیغام جائے کہ ہمیں عوام کی جان سے نہیں کھیلنا ہے۔

ہندوستھان سماچار

---------------

ہندوستان سماچار / انظر حسن