مدراس ہائی کورٹ نے اس معاملے کی سماعت 20 جنوری کو کرنے کا حکم دیا۔

نئی دہلی، 15 جنوری (ہ س)۔ سپریم کورٹ نے تامل اداکار وجے کی فلم جن نائیکن کے پروڈیوسر کی جانب سے اس کی ریلیز سے متعلق دائر درخواست پر سماعت کرنے سے انکار کر دیا ہے۔ جسٹس دیپانکر دتہ کی سربراہی والی بنچ نے درخواست گزار کو ہدایت دی کہ وہ مدراس ہائی کورٹ سے رجوع کریں۔ سپریم کورٹ نے مدراس ہائی کورٹ کو اس معاملے کی سماعت 20 جنوری کو کرنے کا حکم دیا۔

فلم کے پروڈیوسر کے وی این پروڈکشن نے مدراس ہائی کورٹ کے عبوری حکم کو سپریم کورٹ میں چیلنج کیا۔ فلم کو ابتدائی طور پر یو اے سرٹیفکیٹ ملنا تھا، لیکن شکایات کے بعد اس میں تاخیر ہوئی۔ پروڈیوسروں نے 18 دسمبر 2025 کو سنسر بورڈ کے سامنے فلم کی نمائش کی۔ سنسر بورڈ نے فلم کو کچھ کٹوتیوں کے ساتھ یو اے سرٹیفکیٹ دینے کی سفارش کی۔ جس کے بعد پروڈیوسرز نے ضروری تبدیلیاں کیں لیکن سنسر بورڈ نے سرٹیفکیٹ جاری نہیں کیا۔

سنسر بورڈ سے سرٹیفکیٹ نہ ملنے کے بعد فلم کے پروڈیوسرز نے مدراس ہائی کورٹ کے سنگل بنچ کے سامنے عرضی دائر کی۔ سنگل بنچ نے سنسر بورڈ کو جلد ہی یو اے سرٹیفکیٹ جاری کرنے کی ہدایت کی۔ سنسر بورڈ نے اس سنگل بنچ کے حکم کو ہائی کورٹ کے ایک ڈویڑن بنچ میں چیلنج کیا، اور دلیل دی کہ یہ حکم اس کا موقف سنے بغیر دیا گیا۔ ڈویڑن بنچ نے سنگل بنچ کے حکم پر روک لگا دی۔ اس کے بعد فلم کی ریلیز پر غیر یقینی صورتحال پیدا ہوگئی۔ یہ فلم 9 جنوری کو ریلیز ہونے والی تھی۔

اس فلم کو ایچ ونود نے ڈائریکٹ کیا ہے اور اس میں وجے کے مدمقابل پوجا ہیگڑے مرکزی کردار میں ہیں۔ فلم کو 22 ممالک میں چار زبانوں میں ریلیز کیا جانا ہے۔

---------------

ہندوستان سماچار / عبدالسلام صدیقی