نئی دہلی، 14 جنوری (ہ س)۔

ایران میں مسلسل بڑھتی ہوئی کشیدگی کے درمیان، ہندوستانی حکومت نے وہاں پھنسے ہوئے اپنے شہریوں کو بحفاظت نکالنے کے لیے تیاریاں تیز کر دی ہیں۔

وزارت خارجہ کے ذرائع کے مطابق، وزارت بدلتی ہوئی پیش رفت کے درمیان وطن واپسی کے خواہشمند ہندوستانی شہریوں کی واپسی کو یقینی بنانے کے لیے تیاریاں کر رہی ہے۔

قابل ذکر ہے کہ امریکی پابندیوں کے نفاذ کے بعد سے ایران میں مہنگائی مخالف مظاہرے اب حکومت مخالف مظاہروں میں تبدیل ہو گئے ہیں۔ حکومتی کارروائی کے باعث مظاہرین کی ہلاکتوں کی بھی اطلاعات ہیں۔ زیادہ تر پروازوں پر عائد عارضی پابندی کے خاتمے کے بعد اب ایران کی فضائی حدود دوبارہ کھول دی گئی ہے۔

دریں اثنا، ہندوستانی شہریوں کی بحفاظت واپسی کے مطالبات بھی اٹھنے لگے ہیں۔ جموں و کشمیر کے وزیر اعلیٰ عمر عبداللہ نے آج اس سلسلے میں وزیر خارجہ ڈاکٹر ایس جے شنکر سے فون پر بات کی۔ جے شنکر نے زمینی صورتحال اور وزارت خارجہ کی طرف سے لاگو کئے جانے والے منصوبوں کے بارے میں اپنے جائزے کا اشتراک کیا۔ وزیر اعلیٰ عبداللہ نے ٹویٹر پر کہا، میں ان کی اس یقین دہانی کے لیے شکر گزار ہوں کہ ایران میں مقیم جموں و کشمیر کے طلباء اور دیگر کے مفادات اور جانوں کے تحفظ کے لیے اب تمام اقدامات کیے جائیں گے۔

بدھ کے روز، وزارت خارجہ نے ایک ایڈوائزری جاری کرتے ہوئے ہندوستانی شہریوں کو مشورہ دیا کہ وہ وہاں جاری پیش رفت کے پیش نظر اگلے نوٹس تک ایران کا سفر کرنے سے گریز کریں۔ وزارت نے اس سے قبل 5 جنوری کو بھی ایسی ہی ایڈوائزری جاری کی تھی۔

ہندوستانی سفارت خانے نے ایران میں رہنے والے ہندوستانیوں کو بھی مشورہ دیا ہے کہ وہ جلد از جلد کسی بھی طرح سے ملک چھوڑ دیں۔ سفارت خانے نے کہا، ایران میں بدلتی ہوئی صورتحال کے پیش نظر، فی الحال ایران میں موجود ہندوستانی شہریوں (طلباء ، زائرین، تاجروں اور سیاحوں) کو مشورہ دیا جاتا ہے کہ وہ تجارتی پروازوں سمیت دستیاب نقل و حمل کے طریقوں کا استعمال کرتے ہوئے ایران چھوڑ دیں۔

ہندوستھان سماچار

ہندوستان سماچار / عطاءاللہ