ڈھاکہ ، 18 ستمبر (ہ س)۔ بنگلہ دیش کی معزول وزیر اعظم شیخ حسینہ اور ان کے خاندان کے نو افراد اگلے سال فروری میں ہونے والے پارلیمانی انتخابات میں ووٹ نہیں ڈال سکیں گے۔ بنگلہ دیش کے الیکشن کمیشن نے ان کے قومی شناختی کارڈ (این آئی ڈی ) کو بلاک کر دیا ہے۔

ترکیہ کے عوامی نشریاتی ادارے ٹی آر ٹی ورلڈ کے مطابق کمیشن کے ایک اہلکار نے بدھ کو یہ اعلان کیا۔ انہوں نے بتایا کہ فروری میں ہونے والے اگلے پارلیمانی انتخابات میں ووٹنگ ملک کے اندر اور باہر ہو گی۔ پہلی بار، بیرون ملک رہنے والے لوگ آن لائن رجسٹر ہوں گے اور پوسٹل میل کے ذریعے اپنا ووٹ ڈالیں گے۔

کمیشن کے سینئر سکریٹری اختر احمد نے واضح کیا کہ اگر بیرون ملک مقیم بنگلہ دیشی افراد کی این آئی ڈی بلاک کر دیے گئے ہیں تو وہ ووٹ نہیں ڈال سکیں گے۔ کمیشن نے عبوری حکومت کی ہدایت کے بعد اپریل میں حسینہ اور ان کے خاندان کے افراد کی این آئی ڈی بلاک کر دی تھیں۔

احمد نے کہا کہ بیرون ملک سے ووٹ ڈالنے کے لیے این آئی ڈی نمبر کا استعمال کرتے ہوئے آن لائن رجسٹر ہونا ضروری ہے۔ پاسپورٹ کافی نہیں ہے۔ این آئی ڈی لازمی ہے۔ صرف وہی لوگ ووٹ دینے کے اہل ہوں گے جو این آئی ڈی کے ساتھ رجسٹر ہوں گے۔

انہوں نے کہا کہ شیخ حسینہ اور ان کے خاندان کے افراد اگلے الیکشن میں ووٹ نہیں ڈال سکیں گے۔ قابل ذکر ہے کہ 5 اگست 2024 کو ایک عوامی بغاوت میں اپنی حکومت کا تختہ الٹنے کے بعد سے حسینہ ہندوستان میں جلاوطن ہیں۔ ان کے خاندان کے افراد بھی امریکہ اور برطانیہ سمیت دیگر ممالک میں مقیم ہیں۔ اقوام متحدہ کی ایک رپورٹ کے مطابق اس بغاوت میں 1400 افراد مارے گئے۔ حسینہ کو بنگلہ دیش میں کئی مقدمات کا سامنا ہے جن میں اجتماعی قتل کے الزامات بھی شامل ہیں۔

ہندوستھان سماچار

ہندوستان سماچار / محمد شہزاد