غزہ،17ستمبر(ہ س)۔اسرائیلی فوج غزہ شہر میں اپنی زمینی کارروائیوں میں اضافہ کر رہی ہے۔ اس دوران العربیہ کے نمائندے نے بتایا ہے کہ اسرائیلی بم باری نے شہر کے جنوبی علاقے تل ہوا میں برج الظافر 5 کو نشانہ بنایا۔گزشتہ دنوں کے دوران اسرائیلی فوج نے غزہ شہر کی کئی بلند رہائشی عمارتیں تباہ کی ہیں۔ فوج کا کہنا ہے کہ وہ اپنی مخصوص کارروائیوں کی رفتار بڑھانا چاہتی ہے تاکہ حماس کے بنیادی ڈھانچے کو نقصان پہنچے اور اس کے جنگجوو¿ں سے لاحق خطرہ کم کیا جا سکے۔

ایک اسرائیلی فوجی عہدے دار نے صحافیوں سے گفتگو میں کہا جو کچھ ہم نے گزشتہ رات شروع کیا ہے وہ غزہ شہر کی جانب بنیادی قدم ہے۔ ان کے مطابق فوج کا اندازہ ہے کہ شہر میں حماس کے دو سے تین ہزار جنگجو موجود ہیں۔عہدے دار نے مزید بتایا کہ فوج غزہ شہر کے مرکز کی طرف بڑھ رہی ہے، جو کئی ہفتوں سے شدید بم باری کا نشانہ بنا ہوا ہے۔ ان کا کہنا تھا جنوبی کمان نے حماس کے مرکزی گڑھ یعنی غزہ شہر میں زمینی کارروائی کو وسعت دی ہے۔

اسرائیلی وزیر دفاع یسرائیل کاتز نے دعویٰ کیا ہے کہ غزہ شہر جل رہا ہے۔ ان کے مطابق فوج آہنی ہاتھوں سے دہشت گردی کے ڈھانچے کو نشانہ بنا رہی ہے اور سپاہی بہادری سے لڑ رہے ہیں تاکہ یرغمالیوں کی رہائی اور حماس کی شکست کے لیے حالات تیار کیے جا سکیں۔ ہم نہ رکیں گے اور نہ پیچھے ہٹیں گے جب تک اپنا مقصد حاصل نہ کر لیں۔فرانس پریس کے مطابق تقریباً دو سال سے جاری اسرائیلی حملوں نے غزہ شہر کے بیشتر حصے کو ملبے کے ڈھیر میں بدل دیا ہے۔ادھر اقوام متحدہ کی ایک آزاد بین الاقوامی تحقیقاتی کمیٹی نے اسرائیل پر نسل کشی کا الزام لگایا ہے، جو اکتوبر 2023 میں حماس کے حملے کے بعد شروع ہونے والی جنگ کے دوران کی گئی۔ یہ پہلا موقع ہے کہ کسی کمیٹی نے کھل کر اسرائیل پر نسل کشی کا الزام عائد کیا ہے۔اقوام متحدہ کے سیکریٹری جنرل انتونیو گوتریس نے کہا کہ اسرائیل آخر تک جانے پر تلا ہوا ہے اور کسی سنجیدہ امن بات چیت کے لیے تیار نہیں۔

غزہ کی پٹی میں حماس کے زیر انتظام وزارت صحت کے اعداد و شمار کے مطابق اکتوبر 2023 سے اب تک اسرائیلی فوجی مہم میں کم از کم 64 ہزار 964 افراد جاں بحق ہو چکے ہیں، جن میں اکثریت عام شہریوں کی ہے۔ اقوام متحدہ ان اعداد و شمار کو معتبر قرار دیتی ہے۔

ہندوستھان سماچار

ہندوستان سماچار / Mohammad Khan