کولکاتا، 14 ستمبر (ہ س)۔ قومی خواتین کمیشن نے جادھو پور یونیورسٹی کی ایک طالبہ کی موت کا نوٹس لیا ہے۔ اس سلسلے میں کمیشن نے کولکاتہ کے پولیس کمشنر منوج ورما کو خط لکھ کر منصفانہ تحقیقات کا مطالبہ کیا ہے۔ کمیشن نے ہفتہ کو سوشل میڈیا پر پوسٹ کیا کہ دستیاب حقائق کی بنیاد پر اس نے از خود نوٹس لیا ہے اور مقدمہ درج کیا ہے۔ ساتھ ہی یونیورسٹی کیمپس کے سیکورٹی سسٹم پر خصوصی نظر رکھنے کو کہا گیا ہے۔ کمیشن نے کولکاتا پولیس سے تین دن کے اندر تفصیلی رپورٹ طلب کی ہے۔

یہ واقعہ جمعرات کی رات پیش آیا۔ یونیورسٹی کے چار نمبر گیٹ کے قریب اچانک ایک طالب علم کی لاش جھیل کے کنارے تیرتی ہوئی ملی۔ مرنے والی طالبہ کی شناخت انامیکا منڈل کے طور پر کی گئی ہے، جو جادو پور یونیورسٹی کی تھرڈ ایئر گریجویٹ طالبہ تھی۔

طلباء کے مطابق اس دن پارکی لاٹ کے سامنے ڈرامہ کلب کی جانب سے ثقافتی پروگرام کا انعقاد کیا گیا۔ انامیکا نے بھی اس میں حصہ لیا۔ رات تقریباً 9:55 بجے وہ ٹوائلٹ جانے کے لیے اٹھی لیکن اس کے بعد اچانک غائب ہوگئی۔ کچھ دیر بعد اس کی لاش جھیل سے ملی۔

پوسٹ مارٹم رپورٹ جمعہ کی شام سامنے آئی، جس میں زخم کے بیرونی نشانات نہیں ملے۔ رپورٹ کے مطابق موت ڈوبنے سے ہوئی۔ تاہم یہ واضح نہیں ہے کہ طالبہ نے شراب نوشی کی تھی یا کوئی نشہ آور چیز۔ ویزرا کا نمونہ جانچ کے لیے بھیج دیا گیا ہے۔

اس واقعہ کے بعد جادھو پور یونیورسٹی کیمپس کے سیکورٹی نظام پر سنگین سوالات اٹھنے لگے ہیں۔

---------------

ہندوستان سماچار / عبدالسلام صدیقی