لکھنؤ، 13 ستمبر (ہ س)۔ اتر پردیش کی راجدھانی لکھنؤ کے عالم باغ تھانہ علاقے سے جمعرات کو اغوا کیے گئے دو طالب علموں کو پولیس نے جمعہ کو 24 گھنٹے کے اندر لکھیم پور کھیری سے بحفاظت بازیاب کرالیا۔ ایک اغوا کار کو بھی گرفتار کر لیا گیا ہے جس نے 10 لاکھ روپے تاوان کا مطالبہ کیا تھا۔

اسسٹنٹ پولیس کمشنر ابھے پرتاپ سنگھ نے جمعہ کو بتایا کہ دو نابالغ بچوں ارجن سنگھ (12) اور پردیومن یادو (8) کو جمعرات کو بی جی کالونی کے رام لیلا گراونڈ سے اغوا کیا گیا تھا۔ جمعہ کو اغوا کاروں نے بچوں کی حفاظت کے لیے ارجن کے والد بائک مکینک سنجے سنگھ سے 10 لاکھ روپے تاوان کا مطالبہ کیا۔ معاملہ سامنے آنے کے بعد پولیس کی پانچ ٹیمیں تعینات کر دی گئیں۔

پولیس نے اغوا کا مقدمہ درج کیا اور جمعہ کی دیر شام لکھیم پور کے گولا گوکرناتھ علاقے سے دونوں بچوں کو بحفاظت بازیاب کرالیا۔ اس کے ساتھ ہی ملزم اغوا کار وجے شرما کو گرفتار کر لیا گیا ہے جو اصل میں سیتا پور کا رہنے والا ہے اور اس وقت عالم باغ پٹیل نگر میں رہتا ہے۔ پوچھ گچھ کے دوران اس نے بتایا کہ وہ دسویں جماعت کا طالب علم ہے اور پیسے کا لالچ دے کر بچوں کو اپنے ساتھ لے گیا تھا۔

جناب سنگھ نے بتایاکہ ارجن سنگھ کے والد سنجے سنگھ (بائیک مکینک) اور پردیومنا یادو کے والد سنجے یادو، آٹو چلا کر خاندان کی کفالت کرتے تھے۔ بچوں کی بحفاظت بازیابی کے بعد لواحقین نے پولیس سے اظہار تشکر کیا ہے۔ پولیس نے ملزم کو گرفتار کر کے مزید کارروائی شروع کر دی ہے۔

ہندوستھان سماچار

ہندوستان سماچار / محمد شہزاد