نئی دہلی، 11 ستمبر (ہ س)۔ دہلی وقف بورڈ میں بھرتیوں میں بے ضابطگیوں کے معاملے میں عام آدمی پارٹی کے ایم ایل اے امانت اللہ خان سمیت 11 ملزمان کے خلاف درج مقدمے میں جمعرات کو راوز ایونیو کورٹ میں استغاثہ کی جانب سے تین گواہوں کے بیانات درج کیے گئے۔ خصوصی جج دگ وجے سنگھ نے کیس کی اگلی سماعت 12 ستمبر کو کرنے کا حکم دیا۔

کیس میں دو گواہوں عالم فاروقی اور موہت اگروال کے بیانات قلمبند کیے گئے۔ استغاثہ کی درخواست پر ان دونوں گواہوں پر جرح ملتوی کر دی گئی۔ اس معاملے میں ایک گواہ مانویندر سنگھ سے ملزم کی نمائندگی کرنے والے وکلا نے جرح کی۔ عدالت نے گواہ امجد ٹاک کا بیان 12 ستمبر اور تنویر احمد کا 17 ستمبر کو ریکارڈ کرنے کا حکم دیا۔

گزشتہ28 جولائی کو عدالت نے امانت اللہ خان، دہلی وقف بورڈ کے اس وقت کے سی ای او محبوب عالم، حامد اختر، کفایت اللہ خان، رفیع الشان خان، عمران علی، محمد ابرار، عاقب جاوید، اظہر خان، ذاکر خان اور عبدالمنان کے خلاف الزامات طے کیے تھے۔ عدالت نے یکم مارچ 2023 کو تمام ملزمان کی ضمانت منظور کی، 3 نومبر 2022 کو عدالت نے ملزمان کے خلاف دائر چارج شیٹ کا نوٹس لیا۔ عدالت نے ان ملزمان کے خلاف تعزیرات ہند کی دفعہ 120بی اور انسداد بدعنوانی ایکٹ کی دفعہ 13(2)، 13(1)(ڈی) کے تحت الزامات طے کرنے کا حکم دیا تھا۔

ای ڈی کے مطابق یہ معاملہ 13 کروڑ 40 لاکھ روپے کی زمین کی فروخت سے متعلق ہے۔ ای ڈی کے مطابق، اے اے پی ایم ایل اے امانت اللہ خان کی طرف سے نامعلوم ذرائع سے حاصل کی گئی جائیداد سے زمینیں خریدی اور فروخت کی گئیں۔

ہندوستھان سماچار

ہندوستان سماچار / محمد شہزاد