میڑچل ٹاؤن میں زوردار گیس سلنڈر دھماکہ، عمارت منہدم، ایک شخص ہلاک

حیدرآباد، 5 اگست (ہ س) ۔ تلنگانہ کے میڑچل ٹاؤن میں ایک زوردار گیس سلنڈر دھماکہ ہوا، جس کے نتیجہ میں ایک عمارت منہدم ہوگئی۔ دھماکہ کے اثرسے تین دکانیں مکمل طورپرتباہ ہوگئیں، جبکہ عمارت کے ملبے کی زد میں آکر سڑک سے گزرنے والا ایک نامعلوم شخص شدید زخمی ہوگیا تاہم اسپتال منتقلی کے وقت اس کی موت ہوگئی۔

واقعہ میڑچل کے مارکٹ روڈ چوراہے کے قریب پیش آیا۔ پولیس اور مقامی افراد کے مطابق دھماکہ ایک پرانے مکان میں ہوا جہاں روڈ کے رخ پر دو پھولوں کی دکانیں اور ایک موبائل شاپ موجود تھی۔ مکان کے پچھلے حصہ میں رہائشی حصہ تھا جہاں 55 سالہ خاتون تروپتماں مقیم تھیں۔ گیس سلنڈرزوردارآواز کے ساتھ پھٹ پڑا، جس سے عمارت کا بڑا حصہ منہدم ہو گیا۔ ملبہ کی زد میں آ کر راہ گیر ایک 40 سالہ شخص ہلاک ہو گیا۔ خاتون اس واقعہ میں جھلس گئی۔ اس کے علاوہ اسٹیشنری دکان میں کام کرنے والے 29 سالہ رفیق کے ہاتھ پر دیوار کا ٹکڑا گرنے سے اس کا ہاتھ ٹوٹ گیا، جبکہ موبائل شاپ میں کام کرنے والا 25 سالہ دنیش بھی زخمی ہوا۔

خوش قسمتی سے اسی وقت عمارت کے سامنے سے ایک بورویل گاڑی گزر رہی تھی، جس نے کچھ حد تک ملبہ روک دیا، جس سے مزید جانی نقصان ٹل گیا۔ واقعہ کے بعد علاقہ میں خوف و ہراس پھیل گیا۔ متعدد دکانیں بند ہو چکی تھیں جبکہ باقی دکاندار فوری طور پر شٹر گرا کر فرار ہو گئے۔ کچھ دیربعدپولیس اورریسکیو ٹیمیں وہاں پہنچیں۔ زخمیوں کو قریبی اسپتال منتقل کیا گیا، جبکہ پولیس نے سی آئی ستیہ نارائنا کی قیادت میں جانچ کا آغاز کردیا ہے۔۔

ہندوستھان سماچار

ہندوستان سماچار / محمدعبدالخالق