نئی دہلی، 25 اگست (ہ س)۔

دہلی ہائی کورٹ نے سابق مرکزی وزیر اسمرتی ایرانی کے دسویں اور گیارہویں کے تعلیمی ریکارڈ کو عام کرنے کے مرکزی انفارمیشن کمیشن کے حکم پر روک لگا دی ہے۔ جسٹس سچن دتہ کی بنچ نے کہا کہ معلومات کے حق کا سیکشن 3 مکمل نہیں ہے کیونکہ سیکشن 8 (1) کے تحت ذاتی معلومات نہ دینے کی چھوٹ ہے۔

ہائی کورٹ نے کہا کہ آر ٹی آئی کے تحت معلومات کے لیے دائر عرضی مفاد عامہ کی عرضی نہیں ہے۔ تعلیمی قابلیت کے حوالے سے جو بھی معلومات مانگی گئی ہیں، اس کی کوئی قانونی ضرورت نہیں ہے۔ درخواست نوشاد الدین نے دائر کی تھی۔ نوشاد الدین نے حق اطلاعات کے تحت اسمرتی ایرانی کی تعلیمی قابلیت کے بارے میں جانکاری مانگی تھی۔ چیف انفارمیشن آفیسر اور فرسٹ اپیل اتھارٹی نے اسمرتی ایرانی کی تعلیمی قابلیت فراہم کرنے سے انکار کر دیا تھا۔ سنٹرل انفارمیشن کمیشن نے 17 جنوری 2017 کو سنٹرل بورڈ آف سیکنڈری ایجوکیشن کو اسمرتی ایرانی کی تعلیمی قابلیت سے متعلق ریکارڈ کی تصدیق شدہ کاپی فراہم کرنے کی ہدایت کی تھی۔

ہائی کورٹ نے اپنے فیصلے میں کہا کہ کسی کی تعلیمی معلومات کو بغیر کسی مفاد عامہ کے ظاہر کرنا کسی کے نجی معاملات میں مداخلت کے مترادف ہے۔ ہائی کورٹ نے کے ایس پٹسوامی سے متعلق رازداری کے حق پر سپریم کورٹ کے فیصلے کا حوالہ دیا ہے۔ عدالت نے کہا کہ سنٹرل انفارمیشن کمیشن نے اسمرتی ایرانی کے اسکول سے رابطہ کیا تھا اور اس کا رول نمبر معلوم کرنے اور ان کی تعلیمی قابلیت کے بارے میں معلومات فراہم کرنے کا حکم دیا تھا۔ ایسا کرنا حق اطلاعات قانون کی روح کے خلاف ہے۔

ہندوستھان سماچار

ہندوستان سماچار / عطاءاللہ