بارش سے نرمداپورم میں توا ڈیم کی پانی کی سطح بڑھی، 5 دروازے کھولے گئے، اندور میں مکان گرا

بھوپال، 20 اگست (ہ س)۔ مدھیہ پردیش میں مانسون ٹرف، ڈپریشن اور سائکلونک سرکولیشن نظام کی سرگرمی کی وجہ سے موسلادھار اور ہلکی بارش کا سلسلہ جاری ہے۔ بدھ کو بھی ریاست کے کئی اضلاع میں بارش ہوئی۔ راجدھانی بھوپال میں صبح سے ہی پانی وقفے وقفے سے گر رہا ہے۔ وہیں نرمداپورم میں مسلسل بارش کی وجہ سے توا ڈیم کی پانی کی سطح 1164.10 فٹ تک پہنچ گئی ہے۔ اسے کنٹرول کرنے کے لیے بدھ کی صبح ڈیم کے 13 میں سے 5 گیٹ 5-5 فٹ تک کھولے گئے ہیں۔ ان گیٹوں سے تقریباً 43,010 کیوسک پانی چھوڑا جا رہا ہے۔ اس سیزن میں یہ دوسرا موقع ہے جب ڈیم کے دروازے کھولنے پڑے ہیں۔

ریاست میں اب تک اوسطاً 32 انچ بارش ہو چکی ہے۔ مانسون کی بارش کا سلسلہ تاحال جاری ہے۔ اندور ضلع میں بارش کے بعد ایک پرانا مکان اچانک گر گیا۔ گھر پچھلے چند ماہ سے خالی پڑا تھا۔ یہ حادثہ جواہر مارگ سے چندر بھاگا جونی اندور جانے والی لنک روڈ پر پیش آیا۔ اس اچانک حادثے سے آس پاس کے لوگوں میں خوف وہراس پھیل گیا۔ واقعہ کی اطلاع ملتے ہی راوجی بازار پولیس موقع پر پہنچی۔ شکر ہے حادثے میں کوئی جانی نقصان نہیں ہوا۔

محکمہ موسمیات نے آج جبل پور اور رتلام سمیت مدھیہ پردیش کے 23 اضلاع میں شدید بارش کا الرٹ جاری کیا ہے۔ گزشتہ 24 گھنٹوں کے دوران ریاست کے کچھ اضلاع میں کہیں موسلادھار اور کچھ اضلاع میں ہلکی بارش ہوئی۔ اندور میں سب سے زیادہ 3.1 انچ بارش ہوئی۔ رائسین میں 2.7 انچ، اجین میں 1.2 انچ اور سیونی میں 1 انچ بارش ہوئی۔ کھرگون، سیہور، ودیشا، شاجاپور، آگر مالوا، دیواس، نرمداپورم، ساگر، بالاگھاٹ، جبل پور، چھندواڑہ، منڈلا، امریا، کھنڈوا، نرسنگھ پور، گنا، گوالیار، بیتول، دموہ میں بھی ہلکی بارش ریکارڈ کی گئی۔

ہندوستھان سماچار

---------------

ہندوستان سماچار / انظر حسن