حیدرآباد، 20۔ اگست (ہ س)۔ٹیک فیلڈز اسکول کے ڈائریکٹر ڈاکٹر رحمت اللہ خان شروانی کوعثمانیہ یونیورسٹی کی 84 ویں سالانہ کانووکیشن میں مکینیکل انجینئرنگ میں پی ایچ ڈی کی ڈگری سے نوازا گیا۔ یہ اعزاز انہیں اسرو (اسرو) کے چیئرمین ڈاکٹر وی.نارائنن اور وائس چانسلر عثمانیہ یونیورسٹی کے ہاتھوں حاصل ہوا۔اس موقع پر ڈاکٹر شروانی نے اپنے جذبات کا اظہار کرتے ہوئے کہا کہ یہ کامیابی اللہ تعالیٰ کے فضل و کرم سے ممکن ہوئی۔ انہوں نے اپنے والدین، ریسرچ سپروائزر ڈاکٹر معین الدین، کو-سپر وائزر ڈاکٹر ایل. شیوا راما کرشنا، اپنے اساتذہ، اہلیہ، بچوں، بھائی بہنوں اور دوستوں کا شکریہ ادا کیا جنہوں نے ان کے تحقیقی سفر میں ہر طرح کی رہنمائی اور تعاون فراہم کیا۔ڈاکٹر رحمت اللہ خان شروانی ایک تجربہ کار استاد اور محقق ہیں جنہیں تدریس اور تحقیق کا ایک دہائی سے زائد کا تجربہ حاصل ہے۔ وہ متعدد اسکوپس (اسکوپس) انڈیکسڈ تحقیقی مقالات شائع کر چکے ہیں اور کئی پوسٹ گریجویٹ پروجیکٹس کی نگرانی بھی کر چکے ہیں۔ ان کی تحقیق ہائیبرڈ میٹل میٹرکس کمپوزٹس کی تیاری اور خصوصیات کے مطالعے پر مرکوز ہے، جو میٹیریئل سائنس اور انجینئرنگ میں ایک نمایاں پیش رفت تصور کی جا رہی ہے۔ان کی یہ شاندار کامیابی نہ صرف ان کے اہلِ خانہ اور ادارے کے لیے باعثِ فخر ہے بلکہ علمی و تحقیقی برادری کے لیے بھی ایک سنگِ میل کی حیثیت رکھتی ہے۔

ہندوستھان سماچار

ہندوستان سماچار / محمدعبدالخالق