اسلام آباد، 11 اگست (ہ س)۔ پاکستان کے مقبوضہ گلگت میں سیلاب سے تباہ ہونے والے دانیور نالے اور سڑک کی مرمت کے دوران مٹی کا تودہ گرنے سے آٹھ افراد ہلاک ہو گئے۔ راحت اور بچاو حکام کو خدشہ ہے کہ مزید کارکنان اور رضاکار ملبے تلے دبے ہوئے ہیں۔

ایکسپریس ٹریبیون اخبار، اے آر وائی نیوز چینل اور جیو چینل کے مطابق، پولیس نے پیر کو بتایا کہ رضاکار اور کارکنان سڑک کی مرمت کر رہے تھے جب وہ پہاڑی سے لینڈ سلائیڈنگ کے ملبے تلے دب گئے۔ اسپتال ذرائع نے تصدیق کی ہے کہ مرنے والے تمام افراد مقامی رضاکار ہیں۔ ریسکیو حکام کا کہنا ہے کہ ملبے تلے دبے افراد کی تلاش جاری ہے۔

حکومتی ترجمان نے کہا کہ موسمیاتی تبدیلیوں کے باعث گلیشیئرز کے تیزی سے پگھلنے سے کئی دریاوں میں پانی کے بہاو¿میں اضافہ ہوا ہے۔ ششپر گلیشیئر سے آنے والے پانی کے سیلاب نے زرعی اراضی کو نقصان پہنچایا ہے اور ہنزہ جانے والی شاہراہ قراقرم کا ایک حصہ بند کر دیا ہے۔ نگر روڈ سے ٹریفک کو موڑ دیا جا رہا ہے۔ اس سے پاکستان اور چین کے درمیان زمینی رابطہ منقطع ہو گیا ہے۔ دریں اثناء حکام نے علاقے میں مزید بارش اور لینڈ سلائیڈنگ کی وارننگ دی ہے۔ وزیراعلیٰ حاجی گلبر خان نے شاہراہ کو فوری بحال کرنے کی ہدایت کی ہے۔

اس سے قبل حکام نے ڈیرہ غازی خان، شمال مشرقی اور بالائی پنجاب، اسلام آباد-راولپنڈی، شمال مشرقی بلوچستان، چترال، سوات، شانگلہ، مانسہرہ، مری، گلیات، کوہستان، ایبٹ آباد، بونیر، صوابی، نوشہرہ اور مردان میں مقامی دریاوں اور ندی نالوں میں طغیانی کی وارننگ دی تھی۔ خیبرپختونخوا کے پہاڑی علاقوں میں لینڈ سلائیڈنگ کا خطرہ برقرار ہے۔

پولیس نے تصدیق کی کہ امدادی کارروائیوں کے دوران ملبے سے چار افراد کو تشویشناک حالت میں نکالا گیا۔ گزشتہ ہفتے وزیراعظم شہباز شریف نے گلگت بلتستان میں حالیہ سیلاب سے متاثرہ خاندانوں میں معاوضے کے چیک تقسیم کرتے ہوئے 4 ارب روپے کے امدادی پیکج کا اعلان کیا۔

ہندوستھان سماچار

ہندوستان سماچار / محمد شہزاد