سمندر کی لہروں کو کبھی غور سے دیکھا ہے؟ کیسے وہ خاموشی سے آکر قدموں کو چھوتی ہیں اور پھرواپس چلی جاتی ہیں۔ انوراگ باسو کی تازہ ترین فلم ’میٹرو... ان دنوں‘ بھی انہی لہروں کی طرح ہے۔ ایک پ±رسکون کہانی، جو آپ کو جذبات کے ایک وسیع سمندر کے کنارے بیٹھنے کی دعوت دیتی ہے۔ یہ فلم دل کو چھو لینے والے رشتوں کی پرتیں کھولتی ہے، جہاں مختلف نسلوں کی محبت کو بہت خوبصورت انداز میں دکھایا گیا ہے۔ انوپم کھیر، نینا گپتا، پنکج ترپاٹھی، کونکنا سین شرما، آدتیہ رائے کپور، سارہ علی خان، علی فضل اور فاطمہ ثنا شیخ جیسے اداکاروں نے اپنے کرداروں کو اتنی صداقت سے جیا ہے کہ ہر کہانی کسی نہ کسی کو اپنی لگنے لگتی ہے۔ ’میٹرو... ان دنوں‘ کسی مثالی محبت کی تلاش نہیں کرتای بلکہ یہ سکھاتی ہے کہ محبت میں پرفیکٹ ہونا ضروری نہیں، جسے محسوس کرنا ضروری ہے۔ یہ فلم آپ کو سوچنے کا موقع دیتی ہے، آپ کو ہلکا کرتی ہے اور جذبات کے سمندر میں ٹھنڈی لہر بن کر آپ کے دل کو چھو لیتی ہے۔

کہانی ’میٹرو... ان دنوں‘ چار جوڑوں کی کہانی ہے جن کی زندگی مختلف مراحل پر ہے لیکن محبت کے ایک دھاگے سے سب بندھے ہوئے ہیں۔ ایک جوڑا ایسا ہے جس کی محبت جوانی کی دہلیز پرآکر بچھڑ گئی، دوسرا جوڑا ازدواجی زندگی سے بیزار ہے۔ تیسرا جوڑا خاندان اور کیرئیر کے درمیان الجھا ہوا ہے، جب کہ چوتھے جوڑے کو ابھی تک یہ سمجھ نہیں آ سکی کہ وہ کب پیار میں پڑ گئے ۔ اس فلم میں دکھایا گیا ہے کہ وقت کے ساتھ رشتوں میں کیسے دراڑیں آتی ہیں، غلطیاں ہوتی ہیں، لیکن جب انسان ان غلطیوں کو سمجھتا ہے اور انہیں درست کرنا چاہتا ہے، تو وہ سفر ہی اصل کہانی بن جاتا ہے۔ میٹرو... ان دنوںنہ صرف محبت کا مطلب بتاتی ہے بلکہ یہ بھی سکھاتیہے کہ جب کوئی محبت میں گرفتار ہوتا ہے تو اسے برقرار رکھنا اور اس میں کھونے کے بجائے خود کو سنوارنا کتنا ضروری ہے۔

ہدایت کاری

فلم ’میٹرو... ان دنوں‘ کی ہدایت کاری انوراگ باسو نے کی ہے اور یہ کہنا غلط نہیں ہوگا کہ انہوں نے ایک بار پھر کمال کردیا ہے۔ انوراگ نے جس خوبصورتی سے چار مختلف جوڑوں کی کہانیاں بنائی ہیں، وہ قابل تعریف ہے۔ پریتم کی موسیقی کی مٹھاس اور انوراگ کا کہانی سنانے کا فن سامعین کو ایک مختلف زون میں لے جاتا ہے جو سامعین کو شروع سے آخر تک اپنے سحر میں جکڑے رکھتا ہے۔ فلم ہنسی -مذاق سے شروع ہوتی ہے ، لیکن آہستہ آہستہ یہ محبت کے معنی سکھانے لگتی ہے۔ کچھ لمحے ایسے آتے ہیں جب ہونٹوں پر مسکراہٹ آ جاتی ہے اور کچھ لمحے ایسے ہوتے ہیں جب آنکھیں نم ہو جاتی ہیں۔ کہانی اور اسکرین پلے پر انوراگ باسو کی گرفت اتنی مضبوط ہے کہ شائقین جذبات کے اس سمندر میں بہہ جانے سے خود کو نہیں روک پاتے۔

اداکاری

اگر ہم اداکاری کی بات کریں تو ’میٹرو... ان دنو‘ کی پوری اسٹار کاسٹ نے شاندار کارکردگی کا مظاہرہ کیا ہے۔ انوپم کھیر، نینا گپتا، پنکج ترپاٹھی، کونکنا سین شرما، آدتیہ رائے کپور، سارہ علی خان، علی فضل اور فاطمہ ثنا شیخ، سبھی نے اپنے کرداروں میں جان ڈالی ہے۔ ان اداکاروں کی کارکردگی اتنی فطری اور موثر ہے کہ کوئی بھی دوسرے سے کمزور نہیں لگتا۔ سب نے اپنے اپنے کردار کے ساتھ مکمل انصاف کیا ہے۔ خاص طور پر پنکج ترپاٹھی کی مزاحیہ ٹائمنگ فلم کے جذباتی لمحات کے درمیان ایک تازہ سانس کی طرح آتی ہے اور ناظرین کو مسکرانے کا موقع فراہم کرتی ہے۔ ان کی موجودگی کہانی کو ہلکا بنائے رکھنے میں اہم کردار ادا کرتی ہے۔

اگر میٹرو ان دنوں کی خامیوں کی بات کریں تو وہ بہت معمولی ہیں۔ یہ فلم ان ناظرین کے لیے زیادہ موزوں ہے جو ہر سین کو غور سے دیکھنے اور ہر جذبات کو محسوس کرنے کا صبر رکھتے ہیں۔ تاہم دوسرے ہاف کے آغاز میں جب کہانیاں اپنے جذباتی مقام پر پہنچتی ہیں تو ناظرین کرداروں کے مکالموں اور رشتوں کو مزید گہرائی میں دیکھنا چاہتے ہیں لیکن اس وقت موسیقی کی زیادتی اس رفتار کو کچھ کم کرتی نظر آتی ہے۔ اس کے علاوہ کچھ مناظر جذباتی طور پر اتنے گہرے ہوتے ہیں کہ وہ ہر دیکھنے والے سے جڑ نہ سکیں، لیکن یہ بات طے ہے کہ وہ بور نہیں ہوتے۔

اگر یہ کہا جائے کہ 'میٹرو... ان دنوں' سے انوراگ باسو نے نہ صرف میٹرو فلم سیریز کی وراثت کو زندہ رکھا ہے بلکہ اسے نئی بلندیوں تک بھی پہنچایا ہے تو یہ بالکل غلط نہیں ہوگا۔ بالی ووڈ میں ایک ایسی دل کو چھونے والی رومانوی ڈرامہ فلم کی کمی کافی عرصے سے تھی، جسے 'میٹرو... ان دنوں' بہت اچھے طریقے سے پورا کرتی ہے۔ یہ فلم آپ کو ہنساتی ہے، رلاتی ہے، سوچنے پر مجبور کرتی ہے اور آج کے دور میں رشتوں کو نبھانے اور پیار کرنے کا ایک نیا طریقہ بھی سکھاتی ہے۔ ہماری طرف سے، اس فلم کو 3.5 ستارے ملتے ہیں۔

فلم: میٹروان دنوں

کاسٹ: انوپم کھیر، نینا گپتا، پنکج ترپاٹھی، کونکونا سین شرما، علی فضل

فاطمہ ثنا شیخ، آدتیہ رائے کپور، سارہ علی خان، ساشوت چٹرجی اور کش جوتوانی

ڈائریکٹر: انوراگ باسو

پروڈیوسر: انوراگ باسو، بھوشن کمار، کرشن کمار اور تانی باسو

ریٹنگ: 3.5/5

ہندوستھان سماچار

ہندوستان سماچار / محمد شہزاد