طویل عرصے سے انتظار کی جانے والی نتیش تیواری کی فلم رامائن کی پہلی جھلک حال ہی میں سامنے آئی ہے، جس نے ناظرین میں زبردست جوش و خروش پیدا کر دیا ہے۔ بہت سے لوگوں کا خیال ہے کہ یہ فلم باکس آفس پر بڑی ہٹ ثابت ہو سکتی ہے۔ اس شاندار پروجیکٹ کو نمت ملہوترا نے پروڈیوس کیا ہے۔
چند دہائیاں قبل رامانند ساگر کی رامائن نے ہندوستانی ٹیلی ویژن پر تاریخ رقم کی تھی۔ اس سیریز میں ارون گوول نے بھگوان شری رام کا کردار ادا کیا اور دیپیکا چکھالیا نے ماتا سیتا کا کردار ادا کیا اور ہر گھر میں ایک خاص جگہ بنائی۔ اب اس نئی رامائن فلم میں ارون گوول راجہ دشرتھ کے کردار میں نظر آئیں گے۔ حال ہی میں دیپیکا چکھالیا نے بھی اس فلم کے حوالے سے اپنا ردعمل دیا ہے۔ انہوں نے کہا کہ وہ امید کرتی ہیں کہ یہ فلم رامائن کی روح اور وقار کو برقرار رکھے گی، اور آج کی نسل کے لیے ایک معنی خیز تجربہ لائے گی۔
ایک انٹرویو میں دیپیکا چکھالیا نے فلم رامائن کے بارے میں واضح طور پر بات کی۔ انہوں نے کہا، مجھ سے ’رامائنم‘ کے لیے رابطہ نہیں کیا گیا، مجھے کسی کردار کی پیشکش نہیں کی گئی۔ اور مجھے نہیں لگتا کہ انھوں نے مجھے کاسٹ کرنے کے بارے میں سوچا بھی ہوگا۔ میں نے رامائن میں ایک بار ماتا سیتا کا کردار ادا کیا ہے۔ اس لیے اب میں اسی رامائن میں کوئی اور کردار ادا کرنے کا سوچ بھی نہیں سکتی۔“ تاہم، انہوں نے یہ بھی کہا کہ اگر مستقبل میں مہابھارت یا شیوپران جیسے کسی پروجیکٹ میں کوئی مناسب کردار سامنے آتا ہے، تو وہ اس پر ضرور غور کریں گی لیکن رامائن میں ان کاکام کرنے کا کوئی ارادہ نہیں ہے۔
دیپیکا چکھالیا آج بھی ناظرین کے دلوں میں ماتا سیتا کے روپ میں زندہ ہیں۔ رامانند ساگر کی رامائن میں ان کی اداکاری نے اتنا گہرا تاثر چھوڑا کہ اس وقت کے لوگ انہیں واقعی ماتا سیتا سمجھنے لگے۔ بہت سے لوگ عوامی مقامات پر ان کے پاوں چھوتے تھے اور ا نہیں دیوی کی طرح عزت دیتے تھے۔ ارون گوول اور دیپیکا کی جوڑی کو دیکھ کر لوگوں کو لگتا تھا کہ وہ اصلی رام اور سیتا ہیں۔ آج بھی انہیں اسی عقیدت و احترام سے دیکھا جاتا ہے۔
اب جب کہ نتیش تیواری ایک نئے انداز میں رامائن کو بڑے پردے پر لا رہے ہیں، لوگوں کی توقعات بہت بڑھ گئی ہیں۔ یہ دیکھنا دلچسپ ہوگا کہ یہ نئی رامائن سامعین پر کیا تاثر چھوڑتی ہے۔ غور طلب ہے کہ دو سال قبل اوم راوت کی ہدایت کاری میں بنی فلم آدی پورش بھی اسی موضوع پر مبنی تھی۔ پربھاس نے بھگوان شری رام کا کردار ادا کیاجبکہ کریتی سینن نے ماتا سیتا اور سیف علی خان نے راون کا کردار ادا کیا تھا۔ تاہم فلم کو اپنے ڈائیلاگز، وی ایف ایکس اور پریزنٹیشن کی وجہ سے کافی تنقید کا سامنا کرنا پڑا۔ ایسے میں اب سب کی نظریں نتیش تیواری کی رامائن پر لگی ہوئی ہیں کہ آیا یہ فلم ناظرین کی امیدوں پر پورا اتر پائے گی یا نہیں ۔
ہندوستھان سماچار
ہندوستان سماچار / محمد شہزاد
