جنوبی ہند کے مشہور اداکار وجے سیتھوپتی ان دنوں ایک تنازعہ کی وجہ سے خبروں میں ہیں۔ حال ہی میں ایک خاتون نے سوشل میڈیا پر ان پر جنسی زیادتی کا الزام لگایا جس نے فلم انڈسٹری اور مداحوں میں ہلچل مچادی۔ اب پہلی بار وجے سیتھوپتی نے اس پورے معاملے پر اپنی خاموشی توڑی ہے۔ انہوں نے واضح طور پر کہا کہ اس طرح کے الزامات سے انہیں کوئی فرق نہیں پڑتا، کیونکہ انہیں اپنی سچائی پر پورا بھروسہ ہے۔
ایک انٹرویو میں وجے سیتھوپتی نے اپنے اوپر لگے جنسی ہراسانی کے الزامات کو یکسر مسترد کر دیا ہے۔ انہوں نے کہا کہ ان کی ٹیم نے اس معاملے کو سنجیدگی سے لیا ہے اور سائبر کرائم سیل میں شکایت درج کرائی ہے۔ وجے نے کہا، جو لوگ واقعی مجھے جانتے ہیں، ان کے لیے یہ الزامات مکمل طور پر مضحکہ خیز ہیں۔ میں اچھی طرح جانتا ہوں کہ میں کون ہوں اور میری سچائی کیا ہے۔ اس طرح کے بدصورت الزامات مجھے نہیں ہلا سکتے، لیکن ہاں، میرے خاندان اور قریبی دوستوں کو اس سے دکھ پہنچا ہے۔ میں صرف ان سے کہتا ہوں کہ گھبرانے کی ضرورت نہیں ہے، سب ٹھیک ہو جائے گا۔
وجے سیتھوپتی نے مزید کہا، یہ عورت صرف توجہ چاہتی ہے، اگر وہ شہرت کا ایک لمحہ چاہتی ہے تو اسے حاصل کرنے دیں۔ ہم نے اس معاملے کو لے کر سائبر کرائم سیل میں شکایت درج کرائی ہے۔ پچھلے سات سالوں سے، میں اس طرح کی کئی افواہوں اور وسوسوں کا سامنا کر رہا ہوں، ان کا مجھ پر تب کوئی اثر نہیں ہوا اور نہ ہی مستقبل میں ان کا اثر پڑے گا۔ غور طلب ہے کہ وجے پر رامیا موہن نامی خاتون نے جنسی ہراسانی کا الزام لگایا تھا۔
دراصل، سوشل میڈیا پلیٹ فارم ایکس پر ایک خاتون رامیا موہن نے وجے سیتھوپتی پر سنگین الزامات لگاتے ہوئے ایک پوسٹ شیئر کی ہے۔ انہوں نے دعویٰ کیا کہ اداکار نے ایک نوجوان خاتون کا جنسی استحصال کیا اور فلم انڈسٹری میں اپنی 'سینٹ جیسی تصویر' کے پیچھے حقیقت چھپا دی۔ پوسٹ میں یہ بھی کہا گیا ہے کہ وجے نے مبینہ طور پر ایک لڑکی کو 'کارواں فیور' کے بدلے دو لاکھ روپے اور 'ڈرائیو' کے لیے پچاس ہزار روپے کی پیشکش کی تھی۔ رامیا نے یہ بھی الزام لگایا کہ فلم انڈسٹری میں منشیات اور استحصال جیسی چیزیں عام ہیں۔ تاہم اب یہ پوسٹ ڈیلیٹ کر دی گئی ہے لیکن تب تک یہ سوشل میڈیا پر وائرل ہو چکی تھی۔
---------------
ہندوستان سماچار / عبدالسلام صدیقی
