ممبئی، 31 جولائی (ہ س)۔ پرو کبڈی لیگ (پی کے ایل) سیزن 12 اس بار 29 اگست 2025 سے شروع ہونے جا رہا ہے۔ ملک بھر کے تماشائیوں کو چار شہروں وشاکھاپٹنم (ویزاگ)، جے پور، چنئی اور دہلی میں پھیلے اس ملٹی سٹی فارمیٹ میں کبڈی کا بہترین ایکشن دیکھنے کو ملے گا۔
افتتاحی ویک اینڈ شیڈول: پہلا میچ تیلگو ٹائٹنز اور تمل تھالائیواس کے درمیان جمعہ 29 اگست کو ویزاگ کے راجیو گاندھی انڈور اسٹیڈیم میں کھیلا جائے گا۔ اس کے بعد دوسرے میچ میں بنگلورو بلز کا مقابلہ پونیری پلٹن سے ہوگا۔ ہفتہ، 30 اگست کو تیلگو ٹائٹنز ایک بار پھر میدان میں اتریں گے اور اس بار ان کا مقابلہ یوپی یودھا سے ہوگا۔ ساتھ ہی دوسرے میچ میں یو ممبا اور گجرات جائنٹس کی ٹیمیں آمنے سامنے ہوں گی۔ اتوار کو تمل تھلائیواس کا مقابلہ 'سپر سنڈے' کے تحت یو ممبا سے ہوگا، جس کے بعد دفاعی چیمپئن ہریانہ اسٹیلرز بنگال واریئرز کے خلاف اپنے ٹائٹل کے دفاع کا آغاز کریں گے۔
ویزاگ کی وطن واپسی: پی کے ایل سیزن 12 میں ویزاگ کی واپسی ایک تاریخی لمحہ ہے کیونکہ شہر سات سال بعد دوبارہ لیگ کی میزبانی کر رہا ہے۔ ویزاگ نے پہلے، تیسرے اور چھٹے سیزن میں پی کے ایل کی میزبانی بھی کی تھی۔
جے پور: میچ 12 ستمبر سے جے پور کے ایس ایم ایس اسٹیڈیم کے انڈور ہال میں شروع ہوں گے، جس میں جے پور پنک پینتھرس کا مقابلہ بنگلورو بلز سے ہوگا۔ اس کے بعد تمل تھلائیواس اور بنگال واریئرز کے درمیان میچ کھیلا جائے گا۔
چنئی: میچ 29 ستمبر سے چنئی کے ایس ڈی اے ٹی ملٹی پرپز انڈور اسٹیڈیم میں کھیلے جائیں گے۔ اس مرحلے میں یوپی یودھا کا مقابلہ گجرات جائنٹس سے ہوگا، اور دبنگ دہلی کے سی کا مقابلہ ہریانہ اسٹیلرز سے ہوگا، جہاں نوین کمار اپنی سابق ٹیم کے خلاف کھیلتے ہوئے نظر آئیں گے۔
دہلی: لیگ مرحلے کا آخری مرحلہ 13 اکتوبر سے دہلی کے تیاگراج اسپورٹس کمپلیکس میں شروع ہوگا۔ اس مرحلے کے اہم میچ پٹنہ پائریٹس بمقابلہ ہریانہ اسٹیلرز اور یو ممبا بمقابلہ یوپی یودھا ہوں گے۔ لیگ راؤنڈ کا اختتام ٹرپل ہیڈر (تین میچز) کے ساتھ ہوگا، جس سے شائقین کو پلے آف سے قبل کبڈی کا کافی جوش ملے گا۔ پلے آف کے شیڈول کا اعلان بعد میں کیا جائے گا۔ لیگ کمشنر انوپم گوسوامی نے ایک بیان میں کہا، سیزن 12 پرو کبڈی لیگ کی ترقی کا ایک نیا باب ہے۔ اس بار ملٹی سٹی فارمیٹ کے ساتھ، ہم ملک بھر میں کبڈی کے شائقین تک پہنچ رہے ہیں اور ساتھ ہی ساتھ بنیادی علاقوں میں اپنی جڑیں مضبوط کر رہے ہیں۔ خاص طور پر وشاکھاپٹنم میں واپسی ہمارے لیے فخر کی بات ہے۔
---------------
ہندوستان سماچار / عبدالسلام صدیقی
