شکاگو، 31 جولائی (ہ س)۔ مانچسٹر یونائیٹڈ نے پریمیئر لیگ سمر سیریز کے تحت جمعرات کو شکاگو کے سولجر فیلڈ اسٹیڈیم میں کھیلے گئے میچ میں بورن ماؤتھ کو 1-4 سے شکست دے کر ٹورنامنٹ میں اپنی مسلسل دوسری جیت درج کی۔

روبن اموریم کی ٹیم کی جانب سے راسموس ہولنڈ، پیٹرک ڈورگو، عماد ڈیالو اور نوجوان کھلاڑی ایتھن ولیمز نے گول کئے۔ یونائیٹڈ نے اس سے قبل ہفتہ کو ویسٹ ہیم کو 2-1 سے شکست دی تھی۔

بارش اور تیز ہواؤں کے درمیان کھیلے گئے میچ میں یونائیٹڈ نے آٹھویں منٹ میں ہی برتری حاصل کر لی جب ڈورگو کے شاندار کراس پر ہیلنڈ نے گول کر دیا۔

25ویں منٹ میں ڈورگو نے خود گول کر کے یونائیٹڈ کی برتری کو 2-0 کر دیا۔ میسن ماؤنٹ کی فری کک پر گیند کو کنٹرول کرنے کے بعد انہوں نے بورن ماؤتھ کے گول کیپر جورج پیٹرووک کو شکست دے کر گیند کو گول میں ڈال دیا۔

عماد ڈیالو نے دوسرے ہاف کے 53ویں منٹ میں تیسرا گول کیا۔ اس کے بعد 70ویں منٹ میں اموریم نے نو تبدیلیاں کیں اور دو منٹ بعد متبادل کھلاڑی ایتھن ولیمز نے کم شاٹ کے ذریعے چوتھا گول کیا۔

تاہم یونائیٹڈ کے لیے واحد منفی لمحہ 88ویں منٹ میں آیا جب دفاعی کھلاڑی میتھیاس ڈی لیگٹ نے خود ہی گول کر کے اسکور 1-4 کر دیا۔

دن کے دوسرے میچ میں ویسٹ ہیم نے پیچھے رہنے کے باوجود زبردست واپسی کی اور ایورٹن کو 1-2 سے شکست دی۔

ایورٹن کی جانب سے ادریسہ گوئے نے 17ویں منٹ میں گول کر کے ٹیم کو برتری دلائی۔ لیکن ہاف ٹائم سے عین قبل برازیلین انٹرنیشنل لوکاس پیکیٹ نے برابری کا گول کر دیا۔

اس کے بعد جرمنی کے نکلاس فلکروگ نے 64ویں منٹ میں گول کر کے ویسٹ ہیم کو فیصلہ کن برتری دلا دی۔

پری سیزن میں ایورٹن کی یہ مسلسل دوسری شکست تھی۔ اس سے قبل انہیں بورن ماؤتھ کے خلاف 3-0 سے شکست کا سامنا کرنا پڑا تھا۔

میچ کے بعد ایورٹن کے کوچ ڈیوڈ موئیس نے کہا کہ میں زیادہ پریشان نہیں ہوں کیونکہ میرے پاس وہ کھلاڑی نہیں ہیں جن کی مجھے ضرورت ہے۔ ہمیں پہلے ہی معلوم تھا کہ ہمیں یہاں مشکلات کا سامنا کرنا پڑے گا۔ اس وقت ہم نہ تو اس ٹورنامنٹ کے لیے تیار ہیں اور نہ ہی پریمیئر لیگ سیزن کے آغاز کے لیے۔

چار ٹیموں پر مشتمل یہ ٹورنامنٹ اتوار کو اٹلانٹا میں ختم ہوگا جس میں مانچسٹر یونائیٹڈ کا مقابلہ ایورٹن اور ویسٹ ہیم کا مقابلہ بورن ماؤتھ سے ہوگا۔

ہندوستھان سماچار

---------------

ہندوستان سماچار / عبدالواحد