نتیش تیواری کی ہدایت کاری میں بننے والی فلم 'رامائن' کا انتظار اب ختم ہو گیا ہے، کیوں کہ آخر کار 'رامائن' کی پہلی ویڈیو جاری کر دی گئی ہے۔ اس جھلک میں رنبیر کپور بھگوان رام کے روپ میں بہت متاثر کن نظر آرہے ہیں اور مداح ان کے اوتار کو دیکھ کر حیران ہیں۔

'رامائن' میں اداکاروں کی شاندار کاسٹنگ نے ناظرین کے تجسس کو اور بھی بڑھا دیا ہے۔ اس فلم میں سپر اسٹار یش راون کے طاقتور کردار میں نظر آئیں گے اور ٹیزر میں وہ رنبیر کپور کے روبرو دیکھے جا سکتے ہیں۔ روی دوبے لکشمن کا کردار ادا کر رہے ہیں، جب کہ سنی دیول بھگوان ہنومان کے کردار میں اپنے طاقتور انداز میں نظر آئیں گے۔ وجے سیتھوپتی وبھیشنا کے کردار میں نظر آئیں گے، جب کہ راکول پریت سنگھ ایک نئی تصویر میں شرپنکھا کے روپ میں نظر آئیں گی۔ اس کے علاوہ ارون گوول بادشاہ دشرتھ کا کردار ادا کر رہے ہیں اور کنال کپور بھگوان اندرا کے کردار میں نظر آئیں گے۔ فلم کی اسٹار کاسٹ کو دیکھ کر یہ واضح ہے کہ نتیش تیواری کی 'رامائن' ایک شاندار اور تاریخی تجربہ دینے والی ہے۔

نتیش تیواری کی 'رامائن' صرف ایک فلم نہیں ہوگی، بلکہ دو حصوں میں ناظرین کے سامنے آئے گی۔ پہلا حصہ دیوالی 2026 کو ریلیز کیا جائے گا، جب کہ دوسرا حصہ دیوالی 2027 کو سینما گھروں کی زینت بنے گا۔خاص بات یہ ہے کہ سپر اسٹار یش نہ صرف راون کا کردار ادا کر رہے ہیں، بلکہ اس پروجیکٹ سے بطور شریک پروڈیوسر بھی منسلک ہیں۔ رپورٹس کے مطابق 'رامائن' کا بجٹ تقریباً 835 کروڑ روپے ہے، جس سے یہ اب تک کی سب سے مہنگی بھارتی فلم بن گئی ہے۔ اس عظیم الشان پروجیکٹ کو لے کر شائقین میں زبردست جوش و خروش پایا جاتا ہے اور شائقین اس کے بارے میں ہر اپڈیٹ کا بے صبری سے انتظار کر رہے ہیں۔

---------------

ہندوستان سماچار / عبدالسلام صدیقی