سرینگر، 29 جولائی (ہ س): مرکزی وزیر داخلہ امت شاہ نے منگل کو پارلیمنٹ کو بتایا کہ اس سال کے شروع میں پہلگام حملے میں ملوث تینوں دہشت گرد سری نگر میں سیکورٹی فورسز کے ذریعہ کئے گئے آپریشن مہادیو میں مارے گئے ہیں۔ تفصیلات کے مطابق، انہوں نے کہا کہ یہ آپریشن فوج، جموں و کشمیر، پولیس اور سی آر پی ایف نے مشترکہ طور پر کیا تھا۔ ہلاک ہونے والے دہشت گردوں کی شناخت سلیمان، افغانی اور جبران کے نام سے ہوئی ہے، سبھی کو اے گریڈ کے دہشت گرد قرار دیا گیا تھا۔ انہوں نے کہا کہ تینوں پاکستانی شہری تھے۔ ہمارے پاس ان کے ووٹر کارڈ نمبر ہیں اور ان کے پاس سے پاکستانی ساختہ چاکلیٹ برآمد ہوئی ہیں۔ شاہ نے کہا کہ لشکر طیبہ کا کمانڈر سلیمان پہلگام اور گگنگیر دونوں حملوں میں ملوث تھا۔ انہوں نے مزید کہا کہ سیکیورٹی ایجنسیوں کے پاس اس کے کردار کی تصدیق کرنے والے ٹھوس شواہد موجود ہیں۔ انہوں نے کہا کہ پہلگام میں معصوم سیاحوں کو ان کے گھر والوں کے سامنے ان کے مذہب کے بارے میں پوچھے جانے پر بے دردی سے قتل کر دیا گیا۔ انہوں نے حملے کی شدید مذمت کی اور اپنے پیاروں کو کھونے والے خاندانوں سے تعزیت کا اظہار کیا۔ انہوں نے مزید کہا کہ آپریشن سندور کے جواب میں پاکستان نے شہری علاقوں کو نشانہ بنایا جس کے نتیجے میں متعدد شہری زخمی ہوئے اور گوردواروں اور مندروں سمیت مذہبی مقامات کو نقصان پہنچا۔ شاہ نے سرحد پار سے ہونے والی فائرنگ سے متاثر ہونے والوں سے بھی ہمدردی کا اظہار کیا۔ہندوستھان سماچار

ہندوستان سماچار / Aftab Ahmad Mir