سری نگر، 28 جولائی (ہ س)۔ آپریشن مہادیو کے تحت فوج کے ایلیٹ پیرا کمانڈوز نے پیر کو پہلگام دہشت گردانہ حملے کے ماسٹر مائنڈ اور اس کے دو ساتھیوں کو سری نگر کے مضافات میں ہروان کے علاقے ملنار میں ایک تصادم میں مار گرایا۔ دہشت گردوں کی لاشوں کے ساتھ اسلحہ بھی برآمد ہوا ہے۔

حکام کے مطابق، سلیمان عرف آصف، جسے 22 اپریل کے حملے کا ماسٹر مائنڈ سمجھا جاتا ہے، کو پہلگام حملے کے مجرموں کی جانب سے استعمال کیے گئے سیٹلائٹ فون کے استعمال کے تکنیکی سراغ کے بعد سیکورٹی فورسز کے آپریشن مہادیو کے آغاز کے بعد مارا گیا۔انکاونٹر میں مارے گئے دیگر دہشت گردوں کی شناخت جبران (جو گزشتہ سال سونمرگ سرنگ حملے میں ملوث تھا) اور حمزہ افغانی کے طور پرہوئی ہے۔

پہلگام کے بیسرن میدانی علاقوں میں دہشت گردوں نے 26افراد جن میں زیادہ تر سیاح تھے، کا گولی مار کر قتل کر دیا تھا۔ جس کے بعد مسلح افواج نے 7 مئی کو پاکستان میں دہشت گردی کے بنیادی ڈھانچے کے خلاف آپریشن سندور شروع کیا تھا۔

حکام نے بتایا کہ انٹیلی جنس اطلاع ملنے کے بعد علاقے میں دہشت گردوں کے ایک اور گروپ کی موجودگی کا پتہ چلا، جس کے بعد فوج اور دیگر سیکورٹی فورسز کی اضافی نفری بھیج دی گئی ہے۔ مارا گیا جبران گزشتہ برس اکتوبر میں گگن گیر میں سونمرگ ٹنل پروجیکٹ پر دہشت گردانہ حملے میں ملوث تھا۔ اس حملے میں ایک ڈاکٹر سمیت سات افراد ہلاک ہوئے تھے۔ انکاونٹر کے مقام سے ایک ایم 4 کاربائن رائفل، دو اے کے رائفلیں اور دیگر ہتھیار برآمد ہوئے ہیں۔ مارے گئے دہشت گردوں کی لاشوں کو مقامی پولیس کے حوالے کر دیا گیا ہے تاکہ شناخت کے عمل میں مدد ملے اور معیاری آپریٹنگ طریقہ کار کے مطابق قانونی رسمی اور آخری رسومات ادا کی جا سکیں۔

عہدیداروں نے بتایا کہ آج صبح تقریباً 11:30 بجے 24 راشٹریہ رائفلز اور 4 پیرا یونٹس کے جوانوں پر مشتمل ایک پارٹی نے تین دہشت گردوں کے ایک گروپ کا پتہ لگایا۔انسپکٹر جنرل آف پولیس (کشمیر زون) وی کے بردی نے کہا کہ یہ ایک طویل آپریشن تھا جو آخری اطلاعات موصول ہونے تک جاری تھا۔

قبل ازیں سری نگر میں قائم چنار کور نے ٹوئٹر پر ایک پوسٹ میں کہا تھا کہ آپریشن مہادیو کے تحت تین دہشت گرد مارے گئے۔ فوج کی چنار کور نے کہا کہ شدید فائرنگ کے تبادلے میں تین دہشت گرد مارے گئے ہیں۔ آپریشن جاری ہے۔

ہندوستھان سماچار

ہندوستان سماچار / محمد شہزاد