بھوپال کے باشندوں کو بہت جلد ملے گا میٹرو ٹرین کا تحفہ: موہن یادو

وزیر اعلیٰ نے میٹرو ٹرین کے کام کا معائنہ کیا

بھوپال، 27 جولائی (ہ س)۔

وزیر اعلیٰ ڈاکٹر موہن یادو نے اتوار کو کہا کہ ہماری حکومت بہت جلد (اکتوبر 2025 تک) بھوپال کے لوگوں کو میٹرو ٹرین کا منفرد تحفہ دینے کے ہدف کی طرف تیزی سے آگے بڑھ رہی ہے۔ انہوں نے کہا کہ اندور میں مسافر میٹرو سروس شروع ہو گئی ہے۔ اسے عوام کی طرف سے بہت اچھا رسپانس ملا ہے۔

وزیر اعلیٰ ڈاکٹر یادو آج بھوپال میٹرو ٹرین کے کام کا قریب سے معائنہ کرنے کے بعد میڈیا سے خطاب کر رہے تھے۔ انہوں نے کہا کہ بھوپال میٹرو ٹرین کا کام بھی تیز رفتاری سے جاری ہے۔ کچھ کام رہ گیا ہے جو ڈیڑھ سے دو ماہ میں مکمل ہو جائے گا۔ انہوں نے کہا کہ بھوپال میٹرو کا ٹیسٹ رن چل رہا ہے۔ بھوپال میٹرو کا معائنہ ریسرچ ڈیزائن اسٹینڈرڈز آرگنائزیشن (آر ڈی ایس او) نے مکمل کیا ہے۔ کمشنر، میٹرو ریل سیفٹی (سی ایم آر ایس) جلد ہی معائنہ کے لیے آئیں گے۔ کمشنر ریلوے سیفٹی سے اجازت ملتے ہی بھوپال میٹرو ٹرین کا ترجیحی کوریڈور عوام کے لیے کھول دیا جائے گا۔

قبل ازیں وزیر اعلیٰ نے بھوپال میٹرو ٹرین پر ٹرائل سفر (ٹیسٹ رن) کیا۔ انہوں نے تین کوچ والی میٹرو ٹرین میں سبھاش نگر اسٹیشن سے ایمس تک اور واپسی پر ایمس سے آر کے ایم پی اسٹیشن تک ٹیسٹ رن لیکر اس میں دستیاب سہولیات اور خصوصیات کے بارے میں جانا۔ ان کے ساتھ پسماندہ طبقات اور اقلیتی بہبود وزیر مملکت (آزادانہ چارج) کرشنا گور، شہری ترقیات اور ہاؤسنگ محکمہ کے ایڈیشنل چیف سکریٹری سنجے دوبے، سماجی کارکن رویندر یتی، راہل کوٹھاری اور ایم پی میٹرو ٹرین کارپوریشن لمیٹڈ کے افسران بھی تھے۔

انہوں نے کہا کہ وزیر اعظم نریندر مودی کی قیادت میں ہماری حکومت شہری سہولیات کو بڑھانے کے لیے تیزی سے آگے بڑھ رہی ہے۔ وزیر اعظم نے اندور اور بھوپال شہروں کو میٹرو ٹرین کا تحفہ دیا ہے۔ ان کی رہنمائی میں ہماری حکومت جلد ہی بھوپال میٹرو ٹرین کا افتتاح کرنے کی تیاری کر رہی ہے۔ میٹرو ٹرین کے سفر کو پرلطف قرار دیتے ہوئے انہوں نے کہا کہ ہم جلد از جلد بھوپال کے ہر شہری کو اس خوشگوار سفر کا تحفہ دینا چاہتے ہیں۔ میٹرو پر سفر کرنے سے پہلے وزیر اعلیٰ ڈاکٹر یادو نے بھوپال میٹرو ریل کے ترجیحی کاریڈور کے بارے میں معلومات اکٹھی کیں۔ وزیر اعلیٰ نے سبھاش نگر میٹرو اسٹیشن کے قریب واقع میٹرو ٹرین کے سنٹرل کنٹرول روم (کمانڈ سنٹر) کا بھی دورہ کیا اور وہاں سے میٹرو ٹرین کے آپریشن کے بارے میں تکنیکی معلومات حاصل کی۔ ایڈیشنل چیف سکریٹری سنجے دوبے نے وزیر اعلیٰ کو میٹرو ٹرین کے لیے اب تک کی پیش رفت کے بارے میں تفصیلی جانکاری دی۔

میٹرو ٹرین پر سوار ہونے کے بعد وزیر اعلیٰ نے آر کے ایم پی اسٹیشن پر میڈیا سے خطاب کیا اور بھوپال میٹرو ٹرین پروجیکٹ کے بارے میں تفصیلی جانکاری دی۔ انہوں نے کہا کہ بھوپال میٹرو مدھیہ پردیش کی ترقی کی علامت ہے۔ یہ پروجیکٹ کل 6941.40 کروڑ روپے کی لاگت سے تیار کیا جا رہا ہے۔ سبھاش نگر اسٹیشن سے ایمس اسٹیشن تک 2225 کروڑ روپے کی تخمینہ لاگت سے ایک ترجیحی کاریڈور تعمیر کیا جا رہا ہے۔ اس کا کام آخری مرحلے میں ہے۔ ہمارا مقصد اکتوبر 2025 تک اس ترجیحی کوریڈور پر میٹرو ٹرین کا آپریشن شروع کرنا ہے۔ ہمارا روڈ میپ 2030 سے پہلے بھوپال میٹرو (اورنج اور بلیو لائنز) کے دونوں کوریڈور کو مکمل طور پر چلانے کے لیے تیار ہے۔

انہوں نے بتایا کہ بھوپال میٹرو کی ڈیزائن کی رفتار 90 کلومیٹر فی گھنٹہ ہوگی۔ اس کی آپریشنل رفتار 60-40 کلومیٹر فی گھنٹہ ہوگی۔ ہر میٹرو اسٹیشن کے درمیان صرف دو منٹ لگیں گے۔ میٹرو میں مسافروں کے لیے تمام جدید سہولیات ہوں گی جیسے ایسکلیٹر، لفٹیں، بریل سائن، پینے کا صاف پانی، صاف بیت الخلا اور فوری معلومات۔ انہوں نے کہا کہ ہماری حکومت میٹرو ٹرینوں میں معذور افراد کے لیے مکمل طور پر جامع انفراسٹرکچر بھی تشکیل دے رہی ہے۔ تمام میٹرو اسٹیشنوں پر معذور افراد کے لیے آسانی سے نقل و حرکت کی سہولتیں ہوں گی۔ انہوں نے بتایا کہ بھوپال میٹرو ٹرین پروجیکٹ کے لیے کل 27 انتہائی جدید میٹرو ٹرین سیٹ ہوں گے، جن میں سے سات ٹرین سیٹ پہلے ہی بھوپال پہنچ چکے ہیں۔ میٹرو نہ صرف سفر کو آسان بنائے گی بلکہ یہ ماحولیاتی تحفظ اور آلودگی پر قابو پانے میں بھی موثر کردار ادا کرے گی۔

وزیر اعلیٰ نے اندور میٹرو ٹرین کے بقیہ کام کی پیش رفت کے بارے میں بھی میڈیا کو آگاہ کیا۔ انہوں نے کہا کہ اندور میں میٹرو ٹرین خدمات شروع ہو گئی ہیں۔ حکومت کا مقصد ہے کہ اندور میٹرو کے پورے حصے کو، سپر کوریڈور سے مالویہ نگر چوراہہ (ریڈیسن چوراہہ) تک، اس سال کے آخر تک آپریشنل کر دیا جائے۔ اس کے ساتھ اندور شہر کے باشندوں کو میٹرو ٹرین کی مکمل سہولت مل سکے گی۔ انہوں نے کہا کہ ہماری حکومت اس بات کو یقینی بنانے کے لیے پرعزم ہے کہ اندور اور بھوپال میں عالمی معیار کی میٹرو ٹرین سروس وقت پر شروع ہو، تاکہ عام لوگوں کو پبلک ٹرانسپورٹ کا آسان، آرام دہ، بہتر اور محفوظ ذریعہ میسر مل سکے۔

ہندوستھان سماچار

ہندوستان سماچار / انظر حسن