شمال مشرقی دہلی کے تاریخی جلوس عزا میں امڈ پڑا عقید تمندوں کا سیلابنئی دہلی،(ہ س)۔انجمن عزائے حسینی (رجسٹرڈ) ویلکم کے زیراہتمام حسب دستور امسال بھی نواسہ رسول حضرت امام حسین کی شہادت کے سلسلے میں مجالس خمسہ اورجلوس عزا کا اہتمام کیا گیا جس میں کثیرتعداد میں عقید تمندوں نے شرکت کرکے شہزادی کونین حضرت فاطمہ زہرا کو پرسہ دے کرعقیدت کا اظہار کیا۔ سیلم پورکے ویلکم میں حسینی اسٹریٹ واقع عزاخانہ باب المراد میں 16 تا 20 جولائی منعقد ہونے والے خمسہ مجالس میں بالترتیب شاکر ترابی، فرمان حیدر ، خورشید اکبر،غلام سجاد اورعلی ضامن وہمنوا نے سوزخوانی کی اورمشہورومعروف خطیب اہل بیت مولانا سید رئیس احمد جارچوی نے مجالس کوخطاب کیا۔ ہرمجلس کے بعد انجمنہائے ماتمی نے نوحہ خوانی وسینہ زنی کی جن میں انجمن پیام ایمان (جعفرآباد)،انجمن دستہ عباسیہ رجسٹرڈ (دہلی)، انجمن تنظیم ماتم امروہہ (دہلی)، انجمن عزائے حسینی شامل ہیں۔ اتوارکے روزاس سلسلے کی آخری مجلس کے بعد انجمن عزائے حسینی نے جلوس برآمد کیا۔اس موقع پرسید علی حیدر امروہوی اور سید رضاعلی رضن امروہوی نے تقریر سے عزاداروں کے قلوب کو منور کیا۔ جلوس میں تنظیم ماتم امروہہ،انجمن علی ایسوسی ایشن شکارپور ،انجمن سپاہ عباس(رجیٹی)،انجمن دستہ عباسیہ (دہلی)، انجمن پیام ایمان (رجسٹرڈ) جعفرآباد، انجمن شیدائے حسینی (مصطفی آباد)،انجمن عارفی (بگھرا)، انجمن پنجتنی (دکشن پوری)، انجمن امام حسن عسکری(سندرنگری)،انجمن حامیان مرجعیت (خوریجی) نے اپنے ماتمی دستے کے ساتھ شرکت کرکے مخصوص اندازمیں نوحہ خوانی وسینہ زنی کی۔ نظامت کے فرائض پیمبرنقوی نے انجام دیئے۔اس سلسلے میں انجمن عزائے حسینی کے صدر اقبال رضا نے بتایا کہ شمال مشرقی دہلی کے مشہور جلوس ہائے عزا میں سے ایک اس جلوس میں دہلی اورآس پاس کے کثیرتعداد میں مرد وخواتین کے ساتھ معصوم عزاداروں نے شرکت کی۔ جلوس کے دوران انجمن عزائے حسینی کی جانب سے متعدد مقامات پرسبیل اور دیگر تبرکات کا انتظام کیا گیا تھا تاکہ زائرین کوکوئی پریشانی نہ ہو۔ عامر رضا ’رنکو‘ کی اطلاع کے مطابق جلوس کے دوران آل حضور ٹرسٹ کی سرپرستی میں ریڈ کراس کی جانب سے مفت میڈیکل کیمپ بھی لگایا گیا تھا جس میں تقریباً 1000لوگوں نے رابطہ کیا اورتقریباً 200 افراد کو مفت دوائیاں تقسیم کی گئیں۔ اس دوران آل حضورٹرسٹ کی جانب سے ایک ایمبولینس بھی فراہم کی گئی تھی۔ جلوس میں انجمن کے عہدیداران اورممبران نے اپنی اپنی ذمہ داریوں کو بخوبی انجام دے کرجلوس کا کامیاب بنانے میں اہم کردارادا کیا۔ مسٹراقبال رضا نے انجمن عزائے حسینی کی جانب سے جلوس کے موقع پراپنی خدمات انجام دینے والے دہلی پولیس ، علاقائی اے سی پی ،ایس ایچ او،ایم سی ڈی سمیت تمام سرکاری ایجنسیوں کا شکریہ اداکیا۔

ہندوستھان سماچار

ہندوستان سماچار / Md Owais Owais