نئی دہلی، 02 جولائی (ہ س)۔ اس سال کے شروع میں انکم ٹیکس میں کئی رعایتوں کے بعد، مرکزی حکومت اب گڈز اینڈ سروسز ٹیکس (جی ایس ٹی) کو کم کرکے متوسط ​​اور کم آمدنی والے گھرانوں کو راحت فراہم کرنے کی تیاری کر رہی ہے۔ حکومت ضروری اشیاء پر جی ایس ٹی کی شرح کو 12 فیصد سے کم کر کے 5 فیصد کر سکتی ہے۔ جولائی میں ہونے والی جی ایس ٹی کونسل کی 56ویں میٹنگ میں اس سلسلے میں فیصلہ لیا جا سکتا ہے۔

سرکاری ذرائع نے بدھ کو بتایا کہ مرکزی حکومت 12 فیصد جی ایس ٹی ٹیکس سلیب کو مکمل طور پر ختم کرنے پر غور کر رہی ہے، یعنی موجودہ 12 فیصد اشیاء کو 5 فیصد ٹیکس سلیب میں لانے پر غور کر رہی ہے۔ ان میں ٹوتھ پیسٹ اور ٹوتھ پاؤڈر، چھتری، سلائی مشین، پریشر ککر اور کچن کے برتن، الیکٹرک آئرن، گیزر، چھوٹی صلاحیت کی واشنگ مشینیں، سائیکلیں، 1000 روپے سے زائد کے ریڈی میڈ ملبوسات، 500 سے 1000 روپے کے درمیان کے جوتے، اسٹیشنری ،ٹیکے ، سیرامک ٹائلیں اور زراعت کا سامان شامل ہیں۔

ماہرین کا خیال ہے کہ اگر ایسا ہوتا ہے تو اشیا کو ان کی نوعیت کے لحاظ سے 5 فیصد یا 18 فیصد ٹیکس سلیب میں منتقل کیا جا سکتا ہے۔ یہ 2017 کے بعد سے سب سے بڑی جی ایس ٹی تبدیلیوں میں سے ایک ہوگی، جب ملک میں پہلی بار ٹیکس کا نظام متعارف کرایا گیا تھا۔ حکومت کا یہ اقدام متوسط ​​اور کم آمدنی والے خاندانوں کی روز مرہ استعمال کی اشیاء کی قیمتوں میں کمی کر کے مدد کر سکتا ہے۔

---------------

ہندوستان سماچار / عبدالسلام صدیقی