بنگلورو، 2 جولائی (ہ س)۔ آل انڈیا کانگریس کمیٹی (اے آئی سی سی) کے جنرل سکریٹری رندیپ سرجے والا نے پاکستان کو اقوام متحدہ کی سلامتی کونسل (یو این ایس سی) کا عارضی صدر بنائے جانے پر تشویش کا اظہار کیا ہے۔ بدھ کو بنگلورو میں کے پی سی سی کے دفتر میں میڈیا سے بات کرتے ہوئے انہوں نے کہا کہ پاکستان ایک ایسا ملک ہے جس پر دہشت گردوں کو پروان چڑھانے اور مختلف ممالک میں عدم استحکام پھیلانے کی کوشش جیسے سنگین الزامات کا سامنا ہے، اس کے باوجود اسے اتنا ذمہ دار عہدہ کیسے ملا؟

رندیپ سرجے والا نے کہا کہ پاکستان دہشت گردوں کی سرپرستی کرنے والا ملک ہے۔ یہ ایک سنگین معاملہ ہے کہ ایسے ملک کو اقوام متحدہ کی سلامتی کونسل کے اجلاس کی صدارت کا موقع ملتا ہے۔ انہوں نے کہا کہ یہ بہت سنگین مسئلہ ہے۔ انہوں نے اس معاملے پر مرکزی حکومت کو بھی نشانہ بنایا۔انہوں نے مرکزی حکومت سے سوال کیا کہ پاکستان کو حمایت کیوں ملی؟ مرکزی حکومت نے اسے کیوں نہیں روکا؟ کیا حکومت اس موقع کو روکنے کی طاقت نہیں رکھتی؟ اتنے غیر ملکی دوروں کا نتیجہ کیا نکلتا ہے؟

کانگریس جنرل سکریٹری نے کہا کہ پہلگام میں حملہ ہوا ہے۔ باقی ممالک نے پاکستان کا ساتھ دیا۔ لیکن کس ملک نے بھارت کا ساتھ دیا؟ ہمارے ہمسایہ ممالک بھی ہمارا ساتھ دینے نہیں آئے۔ یو پی اے حکومت کے دوران ہمارے پڑوسی ممالک کے ساتھ اچھے تعلقات تھے۔ سری لنکا، بنگلہ دیش اور نیپال سے ہمارے اچھے تعلقات تھے۔ وہ اس وقت تعاون کرتے تھے۔ لیکن پہلگام حملے کے وقت کوئی بھی ہمارا ساتھ دینے نہیں آیا۔

ہندوستھان سماچار

ہندوستان سماچار / Mohammad Khan