ریلوے ڈویژن جموں نے 3.4 کروڑ روپے جرمانے کی صورت میں وصول کیے

جموں، یکم جولائی(ہ س)۔

شمالی ریلوے کے جموں ڈویژن میں جون کے دوران بغیر ٹکٹ سفر، غیر قانونی وینڈنگ، گندگی پھیلانے اور ٹرینوں میں سگریٹ نوشی کے خلاف چلائی گئی خصوصی مہم کے دوران ریلوے حکام نے 3.4 کروڑ روپے جرمانے کی صورت میں وصول کیے ہیں۔ سینئر ڈویژنل کمرشل منیجر اُچت سنگھل کے مطابق، ٹکٹ چیکنگ عملے اور چیف ٹکٹ انسپکٹرز نے مہم کے دوران 5,462 غیر قانونی اور بے ضابطہ سفر کرنے والے مسافروں کو پکڑا، جن سے بھاری جرمانہ وصول کیا گیا۔ اس مہم کا مقصد ریلوے نظام کو منظم بنانا اور مسافروں کو بہتر سہولیات فراہم کرنا تھا۔

اُچت سنگھل نے بتایا کہ اچانک معائنے اور ٹکٹ چیکنگ مہمات کو مستقل بنیادوں پر جاری رکھا جا رہا ہے تاکہ ریلوے میں غیر مجاز افراد کے داخلے اور غیر قانونی سرگرمیوں پر قابو پایا جا سکے۔ انہوں نے کہا کہ عوام کو تاکید کی جاتی ہے کہ وہ صرف درست اور تصدیق شدہ ٹکٹ کے ساتھ ہی سفر کریں۔

صفائی ستھرائی کے حوالے سے بھی ریلوے نے سخت اقدامات کیے ہیں۔ جون کے مہینے میں ریلوے اسٹیشنز پر کوڑا کرکٹ پھینکنے کے 64 معاملات سامنے آئے، جن میں 19 ہزار روپے کا جرمانہ عائد کیا گیا۔

یہ مہم ڈویژنل ریلوے منیجر ویویک کمار کی نگرانی اور اُچت سنگھل کی قیادت میں کامیابی سے انجام دی گئی۔ اس دوران نہ صرف بغیر ٹکٹ سفر پر قابو پایا گیا بلکہ عوام میں صفائی، نظم و ضبط اور قوانین کی پاسداری کا شعور بھی اجاگر ہوا۔

اُچت سنگھل نے چیکنگ عملے کی کارکردگی کو سراہتے ہوئے کہا کہ ان کی محنت سے ڈویژن کی آمدنی میں نمایاں اضافہ ہوا ہے۔ انہوں نے یہ بھی واضح کیا کہ یہ مہم آئندہ بھی مزید شدت کے ساتھ جاری رکھی جائے گی تاکہ ریلوے مسافروں کو ایک محفوظ، آرام دہ اور قانون کے دائرے میں رہ کر سفر کرنے کا ماحول میسر آ سکے۔

ہندوستھان سماچار

---------------

ہندوستان سماچار / محمد اصغر