جموں، یکم جولائی (ہ س)۔

بھارتی ٹیلی کام کمپنی بھارٹی ایئرٹیل نے کہا ہے کہ اس نے مصنوعی ذہانت سے چلنے والے فراڈ ڈیٹیکشن سسٹم کے ذریعے جموں و کشمیر میں صرف 47 دنوں میں 23 لاکھ صارفین کو سائبر دھوکہ دہی سے محفوظ بنایا ہے۔ کمپنی کے مطابق، یہ جدید سسٹم ایئرٹیل کے تمام موبائل اور براڈبینڈ صارفین کے لیے خودکار طور پر فعال ہے اور ایس ایم ایس، واٹس ایپ، ٹیلیگرام، فیس بک، انسٹاگرام، ای میل اور دیگر براؤزرز پر موجود مشتبہ لنکس کو اسکین اور فلٹر کرتا ہے۔

بیان میں کہا گیا ہے کہ یہ نظام روزانہ ایک ارب سے زائد ویب لنکس کا تجزیہ کرتا ہے اور 100 ملی سیکنڈز سے بھی کم وقت میں نقصان دہ سائٹس تک رسائی کو روک دیتا ہے۔

ایئرٹیل کے مطابق، لانچ کے بعد سے اب تک ملک بھر میں 2,01,146 خطرناک لنکس بلاک کیے جا چکے ہیں، جبکہ 11.7 کروڑ صارفین کو تحفظ فراہم کیا گیا ہے، جن میں جموں و کشمیر کے 23 لاکھ صارفین بھی شامل ہیں۔ ایئرٹیل کے جموں و کشمیر کے چیف آپریٹنگ آفیسر دیبیندو آئیچ نے کہا کہ صارفین کو ڈیجیٹل دھوکہ دہی سے بچانا ہماری اولین ترجیح ہے۔ ہم جموں و کشمیر میں یہ جدید سروس بالکل مفت فراہم کر رہے ہیں، تاکہ صارفین کو ایک محفوظ اور پُراعتماد ڈیجیٹل تجربہ ملے۔ سائبر سیکورٹی کو فروغ دینے کے لیے دیبیندو آئیچ نے آئی جی کرائم برانچ، سنیل گپتا سے ملاقات کی، جس میں سائبر جرائم کے خلاف تعاون کو مضبوط بنانے اور ایک مؤثر ڈیجیٹل سیکورٹی نیٹ ورک تشکیل دینے پر تبادلہ خیال کیا گیا۔

بیان میں مزید کہا گیا ہے کہ جموں و کشمیر چونکہ ملک کے ڈیجیٹل طور پر تیزی سے ترقی پانے والے علاقوں میں شامل ہے، اس لیے آن لائن فراڈ کے خدشات بھی بڑھ گئے ہیں۔

فراڈ کرنے والے عناصر جعلی ڈلیوری پیغامات، بینکنگ الرٹس اور فشنگ لنکس کے ذریعے شہریوں کو نشانہ بنا رہے ہیں، خاص طور پر جموں، سرینگر، بارہمولہ اور سانبہ جیسے شہروں میں ان وارداتوں میں اضافہ دیکھا گیا ہے۔ ایئرٹیل کا یہ نظام پورے خطے میں ایک ڈیجیٹل شیلڈ کے طور پر کام کرتا ہے، جو خاندانوں، بزرگوں، گھریلو خواتین، طلباء اور نئے اسمارٹ فون صارفین کو تحفظ فراہم کرتا ہے۔

یہ پلیٹ فارم صارف کی پسندیدہ زبان میں فراڈ الرٹس جاری کرتا ہے، جس سے کم ڈیجیٹل خواندگی والے اضلاع میں اس کی مؤثریت بڑھ جاتی ہے۔ کمپنی نے بتایا کہ یہ نظام خاموشی سے پس منظر میں کام کرتا ہے، کسی انسٹالیشن کی ضرورت نہیں ہوتی، اور مکمل طور پر بلامعاوضہ فراہم کیا جا رہا ہے۔ آن لائن بینکنگ، سرکاری ای سروسز اور دیگر ڈیجیٹل سہولیات کی تیزی سے مقبولیت کے ساتھ، ایئرٹیل کا یہ اقدام جموں و کشمیر میں محفوظ ڈیجیٹل ماحولیاتی نظام کی تشکیل میں اہم کردار ادا کر رہا ہے۔

ہندوستھان سماچار

---------------

ہندوستان سماچار / محمد اصغر