لندن، 26 جون (ہ س)۔ بھارت کی مکسڈمعذورکرکٹ ٹیم نے بدھ کو لارڈز کرکٹ گراو¿نڈ میں کھیلے گئے تیسرے ٹی 20 انٹرنیشنل میچ میں انگلینڈ کو سنسنی خیز مقابلے میں 2 وکٹوں سے شکست دے کر تاریخی فتح درج کی۔ اس جیت کے ساتھ ہی ہندوستان نے سات میچوں کی مکسڈ معذوروائٹلٹی ٹی 20 سیریز میں پہلی فتح حاصل کی ہے۔ ہندوستان اب سیریز میں 1-2 سے پیچھے ہے۔

یہ میچ کئی لحاظ سے تاریخی تھا۔ یہ لارڈز میں کھیلا جانے والا پہلا بین الاقوامی معذور کرکٹ میچ تھا۔ خاص بات یہ ہے کہ ٹھیک 42 سال قبل 25 جون 1983 کو ہندوستان نے کپل دیو کی کپتانی میں اس گراو¿نڈ پر پہلا ورلڈ کپ ٹائٹل جیتا تھا۔ ہندوستانی ٹیم نے اس جیت کو کپل دیو کی 1983 ورلڈ کپ جیتنے والی ٹیم کو وقف کیا۔

اس میچ میں انگلینڈ نے پہلے بیٹنگ کرتے ہوئے 20 اوورز میں 123 رنز بنائے۔ اے براو¿ن نے انگلینڈ کے لیے شاندار نصف سنچری بنائی اور 47 گیندوں میں 77 رنز (5 چوکے، 5 چھکے) بنائے۔ انہوں نے آخری اوور میں 18 رنز بنائے اور انگلینڈ کو باعزت اسکور تک لے گئے۔ ہندوستان کی جانب سے فاسٹ بولر وویک کمار نے 3 اوور میں 16 رن دے کر 3 وکٹیں اور کپتان رویندرا سانت نے 4 اوورز میں صرف 8 رن دے کر 3 وکٹیں حاصل کیں۔

124 رنز کے ہدف کے تعاقب میں بھارت نے آخری اوور میں 8 وکٹوں کے نقصان پر کامیابی حاصل کی۔ بھارت کی جیت کے ہیرو مڈل آرڈر بلے باز سائی آکاش رہے جنہوں نے 44 رنز کی شاندار اننگز کھیلی۔ انگلینڈ کی گیند بازی نے آخری اوور تک میچ کو سنسنی خیز بنا رکھا تھا لیکن آخر کار بھارت نے حوصلہ برقرار رکھا اور میچ جیت لیا۔سیریز میں اب مزید چار میچ کھیلے جانے ہیں۔ اگلا میچ 27 جون بروز جمعہ ووسٹر میں کھیلا جائے گا۔اس سیریز کے تمام میچز سونی لائیو پر براہ راست نشر کیے جا رہے ہیں۔

ہندوستھان سماچار

ہندوستان سماچار / Mohammad Khan