فیروز آباد، 23 جون (ہ س)۔ تھانہ رسول پور پولیس نے ایک تصادم میں دو بدنام چوروں کو گرفتار کیا ہے۔ دونوں ملزمان پیروں میں گولیاں لگنے سے زخمی ہوگئے ہیں جنہیں علاج کے لیے اسپتال میں داخل کرایا گیا ہے۔
ایڈیشنل سپرنٹنڈنٹ آف پولیس سٹی روی شنکر پرساد نے پیر کو بتایا کہ تھانہ جنوبی میں 4 اپریل کو متاثرہ سے لفٹ مانگ کر اس کی جیب سے رقم چرانے کے سلسلے میں ایک مقدمہ درج کیا گیا تھا۔ یکم مئی کو تھانہ جنوبی علاقے میں ایک بار پھر ایسا ہی واقعہ سامنے آیا۔ اس بار نوجوان سے لفٹ مانگنے اور جیب سے پیسے چرانے کے الزام میں مقدمہ درج کیا گیا۔
اسی طرح 14 مئی کو نامعلوم نوجوانوں نے منالال سے موٹرسائیکل پر لفٹ مانگی اور راستے میں اس سے49,000 روپے چھین لئے۔ متاثرہ کی شکایت پر تھانہ رسول پور میں معاملہ درج کیا گیا۔ لفٹ مانگنے پر چوری اور لوٹ مار کی وارداتیں سامنے آنے پر تفتیش کی گئی۔ ایک ہی طرح کی وارداتوں کی تفتیش میں ایک گینگ کے دو شاطر بدمعاشوں کے نام سامنے آئے۔ جس کی بنیاد پر ملزمان کی گرفتاری کے لیے پولیس ٹیمیں تعینات کر دی گئیں۔
اے ایس پی نگر نے بتایا کہ اتوار کی دیر رات تھانہ انچارج رسول پور پردیپ کمار پولیس ٹیم کے ساتھ علاقے میں گشت کر رہے تھے۔ تب انہیں اطلاع ملی کہ مختلف چوری اور دیگر جرائم کرنے والے ملزمان برکت پور ریلوے انڈر پاس پل کے قریب کوئی اور واردات انجام دینے کی کوشش میں گھوم رہے ہیں۔
اس اطلاع پر پولیس نے چیکنگ شروع کردی۔ اس دوران موٹر سائیکل سوار ملزمان نے پولیس ٹیم کو دیکھ کر فائرنگ شروع کر دی۔ جوابی کارروائی میں دونوں ملزمان ٹانگوں میں گولیاں لگنے سے زخمی ہو گئے جنہیں گرفتار کر لیا گیا۔
زخمی ملزمان کی شناخت ارجن عرف گھوڑا ولد منا اور دیپک عرف گلا ساکن وشنو پورہ تھانہ باہ ضلع آگرہ کے طور پر کی گئی ہے۔ تفتیش کے دوران دونوں نے گزشتہ چند ماہ سے فیروز آباد میں چوری اور دیگر وارداتوں کا اعتراف کیا۔ ملزمان کے قبضے سے 315 بور کے دو غیر قانونی پستول، 315 بور کے دو خالی اور 4 زندہ کارتوس، چوری کی مختلف وارداتوں میں چھینی گئی 41200 روپے کی رقم اور ایک اپاچے موٹر سائیکل بغیر نمبر پلیٹ برآمد کر لی گئی ہے۔
اے ایس پی نے بتایا کہ زخمی ملزمان کو پولیس کی تحویل میں علاج کے لیے اسپتال میں داخل کرایا گیا ہے۔ گرفتار ملزمان کی مجرمانہ تاریخ سے تفتیش کرکے مزید قانونی کارروائی کی جارہی ہے۔
ہندوستھان سماچار
ہندوستان سماچار / محمد شہزاد
