ڈویژنل کمشنر جموں نے بھگوتی نگر بیس کیمپ کا دورہ کیا

جموں، 14 جون (ہ س)۔ ڈویژنل کمشنر جموں رمیش کمار اور انسپکٹر جنرل آف پولیس بھیم سین ٹوٹی نے بھگوتی نگر میں واقع امرناتھ یاترا کے یاتری نیواس بیس کیمپ کا دورہ کیا اور یاتریوں کے لیے کیے جا رہے انتظامات کا جائزہ لیا۔ اس موقع پر سی آر پی ایف، جموں و کشمیر پولیس، سول انتظامیہ اور دیگر محکموں کے اعلیٰ افسران بھی ان کے ہمراہ تھے۔ حکام نے یاتری نیواس کمپلیکس کا معائنہ کیا اور جاری تعمیراتی و سہولتی کاموں کی رفتار اور معیار کا جائزہ لیا۔

بعد ازاں منعقدہ اجلاس میں تمام متعلقہ محکموں کی تیاریوں کا تفصیلی جائزہ لیا گیا۔ ڈویژنل کمشنر نے ہدایت دی کہ صفائی، بجلی، پانی، سیکورٹی، طبی سہولیات، آگ سے بچاؤ کے انتظامات اور کنٹرول روم سمیت تمام انتظامات 20 جون تک مکمل کیے جائیں۔ پی ڈبلیو ڈی کو چوکسی چوکیوں، لنگر شیڈز اور جرمن ہینگرز کی تنصیب مکمل کرنے کی ہدایت دی گئی، جبکہ جے ایم سی کو صفائی عملہ اور ٹوائلٹس کی فراہمی یقینی بنانے کو کہا گیا۔

آئی جی پی نے یاتریوں کو قافلے کے ساتھ سفر اور طے شدہ وقت کی پابندی کی تلقین کرتے ہوئے، اس بارے میں وسیع آگاہی کے لیے میڈیا کے بھرپور استعمال پر زور دیا۔

محکمہ صحت کو ادویات، ایمبولینسز اور طبی عملے کی دستیابی یقینی بنانے کی ہدایت دی گئی، جبکہ فائر اینڈ ایمرجنسی سروسز کو فائر ڈرلز اور سی سی ٹی وی کی تنصیب کے احکامات جاری کیے گئے۔

ہندوستھان سماچار

---------------

ہندوستان سماچار / محمد اصغر