اجین، 9 مئی (ہ س)۔

راشٹریہ سویم سیوک سنگھ کے سینٹرل ایگزیکٹو ممبر اندریش کمار نے کہا کہ پہلگام واقعہ کے بعد ملک میں ایک نیا انقلاب آیا ہے۔ مسلمانوں نے اب دہشت گردی کے خلاف آواز بلند کی ہے۔ جو پہلے پاکستان کے خلاف بولنے سے گریز کرتے تھے اب کھل کر بول رہے ہیں۔ پہلے اپوزیشن کے زیر اثر مسلم کمیونٹی حکومت اور فوج پر سوال اٹھاتی تھی لیکن آج وہی طبقہ حکومت اور فوج کے ساتھ کھڑا نظر آرہا ہے۔ اپوزیشن میں بھی تبدیلی آئی ہے اور سماج میں بھی تبدیلی آئی ہے۔

اندریش کمار جمعہ کو اجین میں منعقدہ ایک اجلاس سے خطاب کر رہے تھے۔ وہ یہاں ہر سال نکلنے والی سندھو درشن یاترا کی میٹنگ کے لیے آئے ہیں۔ انہوں نے کہا کہ پہلگام حملے کے بعد وہاں ایک حب الوطنی کی یادگار تعمیر کی جانی چاہئے جو دہشت گردوں کے غیر انسانی کردار کے خلاف حب الوطنی کی علامت کے طور پر کھڑی ہو۔ انہوں نے یہ بھی کہا کہ اب وقت آگیا ہے کہ پاکستان کو سبق سکھایا جائے کیونکہ یہ پانچ حصوں میں بغاوت کی راہ پر گامزن ہے۔

اندریش کمار کے علاوہ سندھو درشن سمیتی اجین کے سربراہ پرکاش چتوڑا، بی جے پی ترجمان گلریز شیخ اور دیگر لوگ اجین میں مہاکال مندر کے قریب بھارت ماتا مندر کے آڈیٹوریم میں منعقدہ میٹنگ میں موجود تھے۔ اجلاس کے بعد بی جے پی اور سندھو یاترا سمیتی کے اراکین نے بھارت ماتا مندر کے باہر پاکستان کے وزیر اعظم شہباز شریف کا پتلا جلا کر احتجاج کیا۔

جمعہ کی نماز سے قبل پولیس نے اجین کے حساس علاقوں میں فلیگ مارچ کیا۔ جس میں 150 سے زائد پولیس اہلکاروں، گھڑ سواروں، کمانڈوز، پولیس گاڑیوں، مسلح مرد و خواتین پولیس اہلکاروں نے شرکت کی۔ فلیگ مارچ توپ خانہ سے شروع ہوا اور مختلف علاقوں سے ہوتا ہوا مہاکال مندر کے قریب چاردھام علاقے میں اختتام پذیر ہوا۔ اس دوران اے ایس پی نتیش بھارگو کے ساتھ سی ایس پی سمیت اگروال، ٹی آئی، بی ڈی ڈی ایس ٹیم اور پولیس بینڈ بھی شامل تھے۔

ایڈیشنل ایس پی نتیش بھارگو نے کہا کہ بین الاقوامی حالات کے پیش نظر ہم داخلی سلامتی پر توجہ دے رہے ہیں۔ جہاں فوج سرحد پر سکیورٹی فراہم کر رہی ہے، ہم اندرونی سکیورٹی فراہم کر رہے ہیں۔ سوشل میڈیا پر غلط پیغامات پھیلا کر شہر کا ماحول خراب کرنے والوں کو بھی گرفتار کیا جا رہا ہے۔ آج حساس علاقوں اور پرہجوم مقامات پر مارچ نکالا گیا ہے۔ اس میں عام لوگوں سے امن کی اپیل کی گئی ہے۔

ہندوستھان سماچار

---------------

ہندوستان سماچار / انظر حسن