نئی دہلی، 12 مئی (ہ س)۔ پاک بھارت سرحد پر جنگ بندی کی وجہ سے مقامی اسٹاک مارکیٹ آج ابتدائی کاروبار کے دوران رواں دواں رہی۔ بازار میں زبردست جوش و خروش کا ماحول ہے، جس کی وجہ سے بینچ مارک انڈیکس سینسیکس اور نفٹی میں تقریباً تین فیصد کا اضافہ درج کیا گیا ہے۔ آج جیسے ہی بازار کھلا، خرید کا اتنا مضبوط رجحان تھا کہ ابتدائی چند منٹوں میں ہی اسٹاک مارکیٹ کے سرمایہ کاروں کی دولت میں 10.59 لاکھ کروڑ روپے کا اضافہ ہوا۔
ابتدائی تجارت میں، نفٹی فارماسیوٹیکل انڈیکس کے علاوہ، باقی تمام سیکٹرل انڈیکس فائدہ کے ساتھ سبز رنگ میں ٹریڈ کر رہے ہیں۔ فارماسیوٹیکل انڈیکس اس وقت اتار چڑھاؤ کے درمیان ایک فلیٹ سطح پر تجارت کرتا ہوا دیکھا جا رہا ہے۔ اسی طرح آج مڈ کیپ اور اسمال کیپ اسٹاکس میں زبردست خریدار دیکھی جارہی ہے۔
مارکیٹ میں تیزی کا اندازہ اس بات سے لگایا جا سکتا ہے کہ ٹریڈنگ شروع ہونے کے فوراً بعد بی ایس ای پر درج کمپنیوں کا مارکیٹ کیپٹلائزیشن بڑھ کر 427 لاکھ کروڑ روپے ہو گیا۔ جبکہ گزشتہ ہفتے کے آخری تجارتی دن جمعہ کو ان کمپنیوں کا بازار سرمایہ 416.41 لاکھ کروڑ روپے (عارضی) تھا۔ اس طرح جیسے ہی مارکیٹ کھلی، سرمایہ کاروں کی دولت میں تقریباً 10.59 لاکھ کروڑ روپے کا اضافہ ہوا۔
سینسیکس اور نفٹی پر درج اسٹاکوں میں، سن فارماسیوٹیکل اور انڈس انڈ بینک ابتدائی تجارت میں گراوٹ کے ساتھ سرخ رنگ میں تجارت کرتے ہوئے دیکھے گئے۔ اس کے علاوہ ان دونوں انڈیکس میں شامل باقی تمام اسٹاک تیزی کے ساتھ گرین زون میں رہے۔ فی الحال، بی ایس ای پر 2,933 اسٹاکس میں فعال تجارت ہو رہی ہے۔ ان میں سے 2,584 حصص سبز نشان میں مضبوطی سے ٹریڈ کر رہے ہیں، جبکہ 256 حصص سرخ نشان میں کمی کے ساتھ ٹریڈ کر رہے ہیں۔ اس کے ساتھ ساتھ ابتدائی ٹریڈنگ کے دوران 93 شیئرز کی قیمت میں کوئی تبدیلی نہیں دیکھی گئی۔
موجودہ ٹریڈنگ میں، 42 اسٹاکس گزشتہ 1 سال میں اپنی بلند ترین سطح پر ٹریڈ کر رہے ہیں، جب کہ 21 اسٹاک گزشتہ 1 سال میں اپنی کم ترین سطح پر گر چکے ہیں۔ مارکیٹ میں جاری خرید و فروخت کے درمیان 176 حصص کی قیمت خرید اپر سرکٹ پر پہنچ گئی جبکہ 52 حصص فروخت کے دباؤ کے باعث لوئر سرکٹ پر پہنچ گئے۔
---------------
ہندوستان سماچار / عبدالسلام صدیقی
