نئی دہلی، 09 اپریل (ہ س)۔

ریزرو بینک آف انڈیا (آر بی آئی) نے عالمی تجارت اور پالیسی کی غیر یقینی صورتحال کی وجہ سے شرح نمو میں 0.20 فیصد کمی کی ہے۔ ریزرو بینک نے رواں مالی سال 2025-26 کے لیے مجموعی گھریلو پیداوار (جی ڈی پی) کی ترقی کی پیشن گوئی کو 6.70 فیصد سے گھٹا کر 6.50 فیصد کر دیا ہے۔ آر بی آئی نے اقتصادی ترقی کو سہارا دینے کے مقصد سے پالیسی ریٹ ریپو کو 0.25 فیصد سے کم کر کے 6 فیصد کر دیا ہے۔

آربی آئی کے گورنر سنجے ملہوترا نے بدھ کو مالی سال 2025-26 کے لیے دو ماہی مانیٹری پالیسی کمیٹی (ایم پی سی) کی جائزہ میٹنگ کے پہلے دن کے بعد نتائج کے بارے میں معلومات دیتے ہوئے اس کا اعلان کیا۔ انہوں نے کہا کہ آبی ذخائر کی بہتر حالت اور 2025-26 میں فصل کی اچھی پیداوار کی توقع کے باعث زرعی شعبے کے لیے امکانات روشن ہیں۔ سنجے ملہوترا نے کہا کہ خطرات ان بنیادی تخمینوں کے درمیان یکساں طور پر متوازن ہیں۔ انہوں نے کہا کہ عالمی عدم استحکام میں حالیہ اضافے کے پیش نظر غیر یقینی صورتحال برقرار ہے۔ ایسی صورتحال میں، ہم نے فروری میں جی ڈی پی کی شرح نمو 6.70 فیصد کے تخمینہ کو 0.20 فیصد کم کر دیا ہے۔ انہوں نے کہا کہ جی ڈی پی کی شرح نمو میں یہ کمی عالمی تجارت اور پالیسی کی غیر یقینی صورتحال کی وجہ سے کی گئی ہے۔

آر بی آئی کے گورنر نے کہا کہ ان تمام عوامل کو مدنظر رکھتے ہوئے، مالی سال 2025-26 کے لیے حقیقی جی ڈی پی کی شرح نمو اب 6.50 فیصد رہنے کا اندازہ لگایا گیا ہے۔ انہوں نے کہا کہ ہندوستانی معیشت کی پہلی سہ ماہی میں 6.50 فیصد کی شرح سے ترقی کی توقع ہے۔ ساتھ ہی، دوسری سہ ماہی میں جی ڈی پی کی شرح نمو 6.70 فیصد، تیسری سہ ماہی میں 6.60 فیصد اور چوتھی سہ ماہی میں 6.30 فیصد رہنے کا اندازہ لگایا گیا ہے۔ سنجے ملہوترا نے کہا کہ مینوفیکچرنگ سرگرمیوں میں بہتری کے آثار ہیں۔ کاروباری توقعات مضبوط ہیں، جبکہ سروس سیکٹر کی سرگرمیاں بھی لچک کا مظاہرہ کر رہی ہیں۔ انہوں نے کہا کہ سرمایہ کاری کی سرگرمیوں میں اضافہ ہوا ہے۔ اعلیٰ صلاحیت کا استعمال، بنیادی ڈھانچے کے اخراجات پر حکومت کا زور، بینکوں اور کارپوریٹس کی بہتر بیلنس شیٹس اور مالی حالات میں بہتری سے مزید سرمایہ کاری کی توقع ہے۔

ہندوستھان سماچار

ہندوستان سماچار / Mohammad Khan