نئی دہلی، 7 اپریل (ہ س) ۔ قومی کمیشن برائے خواتین 8 سے 10 اپریل تک ایودھیا، اتر پردیش میں ریاستی خواتین کمیشن کے عہدیداروں کے لیے تین روزہ صلاحیت سازی اور تربیتی پروگرام کا اہتمام کرے گا۔ اس پروگرام کا مقصد نچلی سطح پر خواتین پر مرکوز مسائل کو زیادہ مؤثر طریقے سے حل کرتے ہوئے قانونی اور حکمت عملی کے ساتھ ریاستی کمیشن کے کام کاج کو مضبوط بنانا ہے۔ قومی کمیشن برائے خواتین کی چیئرپرسن وجیا راہتکر اس تقریب کے دوران اپنے خیالات کا اظہار کرنے، مندوبین کے ساتھ بات چیت کرنے اور کارروائی کی رہنمائی کے لیے موجود رہیں گی۔

پیر کے روز پروگرام کی تفصیلات بتاتے ہوئے، خواتین کے قومی کمیشن نے کہا کہ اس پروگرام میں پری میرج کمیونٹی سینٹرز میں ریاستی خواتین کمیشن کے کردار پر ایک سیشن بھی شامل ہوگا، جہاں ایسے مراکز کے مقصد اور اہمیت پر بات کی جائے گی۔ اس سیشن میں اس بات پر روشنی ڈالی جائے گی کہ کس طرح پری میرج کمیونٹی سینٹرز تعلقات کی تعلیم کو فروغ دے سکتے ہیں اور ازدواجی تنازعات کو روکنے میں مدد کر سکتے ہیں۔ تربیت کا ایک اور اہم جز جنسی ہراسانی کی روک تھام پر توجہ مرکوز کرے گا، جس میں کام کی جگہوں پر ہراساں کرنے کی روک تھام اور ان سے نمٹنے کے لیے ادارہ جاتی میکانزم کو مضبوط بنانے پر زور دیا جائے گا۔

ہندوستھان سماچار

---------------

ہندوستان سماچار / عبدالواحد