نئی دہلی، 24 اپریل (ہ س)۔ نیسلے انڈیا لمیٹڈ نے مالی سال 2024-25 کی جنوری-مارچ سہ ماہی کے نتائج کا اعلان کیا ہے۔ 31 مارچ کو ختم ہونے والی چوتھی سہ ماہی میں کمپنی کا منافع 6.5 فیصد کم ہو کر 873.46 کروڑ روپے ہو گیا۔ پچھلے مالی سال 2023-24 کی جنوری-مارچ سہ ماہی میں، کمپنی کا خالص منافع 934.17 کروڑ روپے تھا۔ نیسلے انڈیا نے اپنے شیئر ہولڈرز کو فی حصص 10 روپے ڈیویڈنڈ کا اعلان کیا ہے۔

سوئس ملٹی نیشنل کمپنی نیسلے انڈیا نے جمعرات کو اسٹاک مارکیٹ کو ایک ریگولیٹری فائلنگ میں مطلع کیا کہ جنوری-مارچ سہ ماہی میں مصنوعات کی فروخت سے کمپنی کی آمدنی 3.67 فیصد بڑھ کر 5,447.64 کروڑ روپے ہوگئی۔ پچھلے مالی سال کی اسی سہ ماہی میں یہ 5,254.43 کروڑ روپے تھی۔ مارچ کی سہ ماہی میں کمپنی کا کل خرچ 4,307.76 کروڑ روپے رہا۔ نیسلے انڈیا کی گھریلو فروخت مالی سال 2024-25 کی مارچ سہ ماہی میں 4.24 فیصد بڑھ کر 5,234.98 کروڑ روپے ہو گئی جو پچھلے مالی سال کی اسی سہ ماہی میں 5,021.61 کروڑ روپے تھی۔

کمپنی کے چیئرمین اور منیجنگ ڈائریکٹر سریش نارائنن نے کہا، جنوری-مارچ سہ ماہی میں مشروبات اور کنفیکشنری دوہرے ہندسوں میں بڑھی ہے۔ ہماری گھریلو فروخت 5,235 کروڑ روپے سے تجاوز کر گئی، جو کسی بھی سہ ماہی میں اب تک کی سب سے زیادہ ہے۔

---------------

ہندوستان سماچار / عبدالسلام صدیقی