اوبامیانگ کے تاخیر سے گول کی بدولت القدسیہ نے النصر کو 1-2 سے شکست دی

نئی دہلی، 19 اپریل (ہ س)۔ پرنس محمد بن فہد اسٹیڈیم میں جمعہ کو کھیلے گئے سعودی پرو لیگ میچ میں پیری ایمرک اوبامیانگ کے دیر سے کئے گئے فاتح گول کی بدولت القدسیہ نے النصر کو 1-2 سے شکست دی۔ اس شکست کے ساتھ ہی النصر کی خطابی دوڑ کو بڑا دھچکا لگا ہے۔ القدسیہ نے میچ کے آغاز سے ہی جارحانہ کھیل کا مظاہرہ کیا اور 35 ویں منٹ میں ترکی العمار کے آسان ٹیپ ان گول کی مدد سے 0-1 کی برتری حاصل کر لی۔ اس گول کی بنیاد اوبامیانگ نے رکھی تھی، جو مسلسل اپوزیشن کے دفاع کے پیچھے دوڑ لگا کر دباو بنا رہے تھے۔ ان کی تیز شاٹ کو گول کیپر بینٹو نے روکا، لیکن العمار نے ریباونڈ میں کوئی غلطی نہیں کی۔

دوسرے ہاف میں النصر نے برابری کی بھرپور کوشش کی۔ 57 ویں منٹ میں کرسٹیانو رونالڈو نے گیند پر کنٹرول کھو دیا جس کے بعد جان ڈوران کو شاندار موقع ملا تاہم ان کا شاٹ گول کے اوپر چلا گیا۔ یہ لمحہ النصر کے لیے میچ بدلنے والا ہو سکتا تھا۔ 84ویں منٹ میں برازیل کے مڈفیلڈر اوٹاویو کے شاندار کراس سے ساڈیو مانے نے شاندار ٹچ کے بعد گیند کو گول کیپر کے پاس سے گول میں ڈال کر اسکور 1-1 کر دیا۔ اس گول کے بعد النصر کیمپ میں خوشیاں لوٹ آئی تھیں۔

لیکن مانے کے گول کے صرف تین منٹ بعد، اوبامیانگ نے ناہیتان نینڈیس کے کراس پر ہیڈر کے ذریعے القدسیہ کو دوبارہ برتری دلادی۔ یہ گول فیصلہ کن ثابت ہوا اور النصر کو شکست کا منہ دیکھنا پڑا۔ اس جیت کے باوجود القدسیہ پانچویں نمبر (55 پوائنٹس، 28 میچز) پر برقرار ہے۔ دریں اثنا، شکست کے بعد النصر تیسرے نمبر (64 پوائنٹس) پر برقرار ہے اور اب لیگ لیڈروں الاتحاد سے آٹھ پوائنٹ پیچھے ہے۔ اس سے اس کی خطابی امیدوں کو بڑا دھچکا لگا ہے۔

ہندوستھان سماچار

---------------

ہندوستان سماچار / انظر حسن