وزیر جنگلات جاوید رانا نے ادھم پور میں عوامی دربار منععقد کیا

جموں، 15 اپریل (ہ س)۔ جل شکتی، جنگلات، ماحولیات و قبائلی امور کے وزیر جاوید احمد رانا نے کوٹلہ موڑ، ادھم پور میں ایک عوامی اجلاس منعقد کیا، جس کا مقصد مقامی باشندوں کے مسائل کا براہ راست جائزہ لینا اور ان کے فوری ازالے کے لیے اقدامات کرنا تھا۔ اجلاس میں مختلف وفود اور علاقہ مکینوں نے شرکت کی اور وزیر موصوف کے سامنے اپنے مسائل اور مطالبات رکھے۔ پانی کی قلت کا مسئلہ اجاگر کرتے ہوئے ایک وفد نے شکایت کی کہ علاقے میں باقاعدہ اور مستقل پانی کی فراہمی نہ ہونے کے باعث عوام کو شدید مشکلات کا سامنا ہے، انہوں نے جلد از جلد مؤثر اقدامات کی اپیل کی۔

ایک اور وفد نے جنگلاتی حقوق ایکٹ کے مکمل اور منصفانہ نفاذ کا مطالبہ کیا۔ ان کا کہنا تھا کہ جنگلات میں رہنے والے طبقے اپنے بنیادی حقوق سے اب تک محروم ہیں کیونکہ اس قانون پر عمل درآمد سست روی کا شکار ہے۔ اسی طرح، قبائلی آبادی کی نمائندگی کرنے والے وفد نے قبائلی ذیلی منصوبہ کے تحت بنیادی ڈھانچے کی ترقی، تعلیم، صحت اور روزگار کے شعبوں میں ترجیحی بنیادوں پر فنڈز کی فراہمی کا مطالبہ کیا۔ ان کا کہنا تھا کہ ترقیاتی وسائل کی تقسیم میں قبائلی آبادی کے تناسب کا لحاظ رکھا جائے۔

وزیر جاوید احمد رانا نے تمام شکایات کو بغور سنا اور عوام کو یقین دلایا کہ حکومت عوامی مسائل کے حل کے لیے سنجیدہ اور پُرعزم ہے۔ انہوں نے کہا کہ تمام جائز مطالبات کو ترجیحی بنیادوں پر مرحلہ وار پورا کیا جائے گا تاکہ لوگوں کو بہتر سہولیات فراہم کی جا سکیں۔

ہندوستھان سماچار

---------------

ہندوستان سماچار / محمد اصغر