نئی دہلی، 29 مارچ (ہ س)۔

ہندوستانی بحریہ کے جہاز آئی این ایس ستپورہ اورآئی این ایس ساوتری آپریشن برہما کے تحت انسانی امداد کے ساتھ زلزلہ زدہ میانمار کی ینگون بندرگاہ کی طرف روانہ ہو رہے ہیں۔ یہ جانکاری وزیر خارجہ ڈاکٹر ایس جے شنکر نے آج یہاں دی۔

ٹویٹر پر ایک پوسٹ میں یہ معلومات شیئر کرتے ہوئے، وزیر خارجہ نے کہا، آپریشن برہما - ہندوستانی بحریہ کے جہاز آئی این ایس ست پورہ اور آئی این ایس ساوتری 40 ٹن انسانی امداد کے ساتھ ینگون بندرگاہ کی طرف روانہ ہوئے۔

ایک اور پوسٹ میں، انہوں نے کہا، 80 رکنی این ڈی آر ایف کی تلاش اور بچاو¿ ٹیم نی پی تو کے لیے روانہ ہوگئی۔ وہ میانمار میں بچاو¿ کارروائیوں میں مدد کریں گے۔

آج صبح، ہندوستانی فضائیہ کے سی-130J طیارے کے ذریعے بھیجے گئے 15 ٹن انسانی امدادی سامان کی پہلی کھیپ میانمار پہنچی۔ ینگون میں سفیر ابھے ٹھاکر نے امدادی سامان کی یہ پہلی کھیپ باضابطہ طور پر ینگون کے وزیر اعلیٰ یو سو تھین کے حوالے کی۔ اس میں کمبل، ترپال، حفظان صحت کی کٹس، سلیپنگ بیگ، سولر لیمپ، فوڈ پیکٹ اور کچن سیٹس ہیں۔ پرواز میں سرچ اینڈ ریسکیو ٹیم اور میڈیکل ٹیم بھی ساتھ ہے۔

وزیر اعظم نریندر مودی نے ہفتہ کو ٹویٹر پر لکھا کہ انہوں نے میانمار کے سینئر جنرل من آنگ ہلینگ سے بات کی۔ تباہ کن زلزلے سے ہونے والی ہلاکتوں پر گہرے دکھ کا اظہار کیا۔ ایک قریبی دوست اور پڑوسی کے طور پر، ہندوستان اس مشکل وقت میں میانمار کے لوگوں کے ساتھ یکجہتی کے ساتھ کھڑا ہے۔ آپریشن برہما کے تحت قدرتی آفات سے نمٹنے کے لیے امدادی سامان، انسانی امداد، سرچ اینڈ ریسکیو ٹیمیں تیزی سے متاثرہ علاقوں میں روانہ کی جا رہی ہیں۔

دریں اثناء نیشنل سینٹر فار سیسمولوجی کے مطابق میانمار کے زلزلہ زدہ علاقے میں ریکٹر اسکیل پر 4.7 کی شدت کا آفٹر شاک آیا ہے۔ اس کا مرکز بھی زمین میں 10 کلومیٹر گہرائی میں ہے۔ ذیل میں وضاحت کی گئی ہے۔

قابل ذکر ہے کہ جمعہ کو میانمار اور پڑوسی ملک تھائی لینڈ میں 7.7 شدت کا زلزلہ آیا تھا۔ میانمار میں آنے والے تباہ کن زلزلے کے نتیجے میں اب تک 694 افراد ہلاک اور 1600 سے زائد زخمی ہو چکے ہیں۔

ہندوستھان سماچار

ہندوستان سماچار / عطاءاللہ