کامروپ (آسام)، 25 مارچ (ہ س)۔ رابھا ہسونگ خود مختار کونسل (آر ایچ اے سی) کے انتخابات سے قبل بوکو کے گیمریمورا میں دو دھڑوں کے درمیان کشیدگی بڑھ کر تشدد میں بدل گئی۔ کچھ ہی دیر میں یہ تصادم آتش زنی اور توڑ پھوڑ میں تبدیل ہوگیا۔

پولیس نے بتایا کہ منگل کو نامعلوم بدمعاشوں نے نمبر 24 لوکی حلقہ سے رابھا ہسونگ سنیکت سنگھرش سمیتی اور این ڈی اے امیدوار تلوتما رابھا کے دفتر کو آگ لگا دی۔ اسی دوران ایک اور گروپ نے گمریمورا اے آر ایس یو کے دفتر پر حملہ کیا اور اس میں توڑ پھوڑ کی اور املاک کو نقصان پہنچایا۔

تشدد کے دوران گاڑیوں کو بھی نشانہ بنایا گیا۔ ایک موٹر سائیکل کو آگ لگا دی گئی جبکہ دوسری کو بری طرح نقصان پہنچایا گیا، جس سے مقامی لوگوں میں خوف کی فضاءپیدا ہو گئی۔ صورتحال پر قابو پانے کے لیے پولیس کو فوری مداخلت کرنا پڑی۔

بوکو پولیس موقع پر پہنچی اور حالات پر قابو پانے کے لیے تعینات کر دی گئی۔ انتظامیہ نے واقعے کی تحقیقات شروع کردی ہیں اور ملزمان کی نشاندہی کرکے ان کے خلاف قانونی کارروائی کی تیاریاں کی جارہی ہیں۔

ہندوستھان سماچار

ہندوستان سماچار / محمد شہزاد