جموں، 14 مارچ (ہ س)۔ جموں و کشمیر کے لیفٹیننٹ گورنر منوج سنہا اور وزیر اعلیٰ عمر عبداللہ نے ہولی کے موقع پر عوام کو مبارکباد دی ہے۔

لیفٹیننٹ گورنر نے اپنے پیغام میں کہا کہ ہولی کے پُرمسرت موقع پر میں تمام لوگوں کو دلی مبارکباد اور نیک خواہشات پیش کرتا ہوں۔ ہولی، جو رنگوں کا تہوار ہے، ہماری زندگی میں خوشی، امید اور تکمیل کی علامت ہے۔ انہوں نے مزید کہا کہ یہ خوشگوار موقع روایتی جوش و خروش کے ساتھ بہار کی آمد کی نوید سناتا ہے، اور اس کے رنگ ہماری ثقافتی تنوع اور شاندار روایات کی عکاسی کرتے ہیں۔ لیفٹیننٹ گورنر نے دعا کی کہ یہ مقدس تہوار خوشی اور مسرت لائے اور ایک روشن مستقبل کی امید پیدا کرے۔

وزیر اعلیٰ عمر عبداللہ نے اپنے پیغام میں کہا کہ ہولی خوشی، مسرت اور یکجہتی کی علامت ہے۔ انہوں نے امید ظاہر کی کہ یہ تہوار بھائی چارے کے رشتے کو مزید مضبوط کرے گا۔انہوں نے کہا کہ ہولی کے رنگ زندگی کی خوبصورتی اور اتحاد کے جذبے کی نمائندگی کرتے ہیں۔ میری دعا ہے کہ یہ تہوار سب کی زندگی میں خوشحالی، مسرت اور خوشیوں کا سبب بنے۔ وزیر اعلیٰ نے جموں و کشمیر میں امن، ترقی اور خوشحالی کے لیے دعا کی اور امید ظاہر کی کہ یہ موقع سب کے لیے نئی خوشیاں اور امیدیں لے کر آئے گا۔

ہندوستھان سماچار

---------------

ہندوستان سماچار / محمد اصغر