نئی دہلی، 14 مارچ (ہ س)۔ رائے پور میں جمعرات کو کھیلے گئے انٹرنیشنل ماسٹرز لیگ (آئی ایم ایل) 2025 کے سیمی فائنل میچ میں انڈیا ماسٹرز نے آسٹریلیا ماسٹرز کو 94 رنوں سے شکست دے کر فائنل میں داخلہ حاصل کر لیا۔ سچن تیندولکر کی قیادت والی ٹیم اب فائنل میں سری لنکا ماسٹرز اور ویسٹ انڈیز ماسٹرز کے درمیان دوسرے سیمی فائنل کے فاتح سے مقابلہ کرے گی۔

ٹاس ہارکر پہلے بلے بازی کرنے اتری انڈیا ماسٹرز کی شروعات اچھی نہیں رہی اور امباتی رائیڈو جلد آوٹ ہو گئے۔ اسٹیو او کیف کی تیز ٹرننگ گیند نے انہیں کٹ شاٹس کھیلنے کا موقع نہیں دیا۔ اس کے بعد سچن تیندولکر نے اپنے کلاسک انداز میں کچھ شاندار شاٹس مارے اور پاور پلے میں ٹیم کو اچھی شروعات دلائی۔

یوراج سنگھ نے آتے ہی جارحانہ انداز اپنایا اور صرف 30 گیندوں میں 59 رن بنائے جس میں سات چھکے شامل تھے۔ انہوں نے اسپنرز کو بالخصوص ٹانگ سائیڈ پر مار کر شائقین کو لطف اندوز کیا۔ تیندولکر اور یوراج کے درمیان 47 رنوں کی شراکت ہوئی جس کی وجہ سے انڈیا ماسٹرز نے میچ پر اپنی گرفت مضبوط کر لی۔ اس کے بعد یوسف پٹھان اور اسٹیورٹ بنی کی شراکت سے ٹیم نے 20 اوورز میں 220/7 کا بڑا اسکور کھڑا کیا۔

220 رنوں کے ہدف کے تعاقب میں اتری آسٹریلیا ماسٹرز کا آغاز خراب رہا۔ ونے کمار نے پہلے ہی اوور میں شین واٹسن اور شان مارش کو آوٹ کر دیا جس سے آسٹریلیا کی مشکلات بڑھ گئیں۔ اس کے بعد شہباز ندیم نے مڈل آرڈر کی کمر توڑ دی۔ ان کی سیدھی اور ٹرننگ گیندوں نے بلے بازوں کو پریشان کر دیا۔

حالانکہ بین کٹنگ نے 30 گیندوں پر 39 رن بنا کر کچھ دیر جدوجہد کی لیکن یہ ناکافی رہا۔ آخر میں عرفان پٹھان نے آخری دو وکٹیں لے کر انڈیا ماسٹرز کو فتح دلائی۔ بھارت نے یہ میچ 94 رنوں سے جیت کر اب فائنل میں جگہ بنا لی ہے۔

ہندوستھان سماچار

---------------

ہندوستان سماچار / انظر حسن