کولکاتا، 13 مارچ (ہ س)۔ مغربی بنگال میں اپوزیشن لیڈر شبھیندو ادھیکاری کے متنازعہ بیان نے ریاست کی سیاست کو گرما دیا ہے۔ انہوں نے اقتدار میں آنے کے بعد ترنمول کانگریس کے ٹکٹ پر جیتنے والے ایم ایل اے کو گھسیٹنے (اٹھا کر پھینکنے) کی دھمکی دی۔ اس بیان کو لے کر ریاستی کانگریس نے لال بازار میں کولکاتا پولیس ہیڈکوارٹر میں ان کے خلاف شکایت درج کرائی ہے۔ کانگریس لیڈر سمن رائے چودھری نے کولکاتا پولیس کے ایڈیشنل کمشنر کو ای میل بھیج کر اس بیان کو آئین کی توہین قرار دیا اور مناسب کارروائی کا مطالبہ کیا۔

منگل کو اسمبلی کے باہر نامہ نگاروں سے بات کرتے ہوئے، شبھیندو ادھیکاری نے کہا تھا، ترنمول کانگریس بنگال میں ہندو برادری کو تباہ کرنا چاہتی ہے۔ ان کی پارٹی سے جیتنے والے تمام مسلم ایم ایل اے کو 10 ماہ بعد سڑک پر گھسیٹا جائے گا۔ ان کے اس بیان کے بعد ریاست میں شدید ردعمل سامنے آیا۔ بدھ کو اسمبلی میں اس بیان کے خلاف مذمتی تحریک لائی گئی، جس میں وزیر اعلیٰ ممتا بنرجی نے بھی ادھیکاری کا نام لیے بغیر نشانہ بنایا۔

اس کے بعد ریاستی کانگریس سکریٹری سمن رائے چودھری نے اپنی شکایت میں کہا کہ شبھیندو ادھیکاری کا بیان نہ صرف آئین کے بنیادی جذبات کی توہین ہے بلکہ اس سے اقلیتی برادری میں خوف کا ماحول بھی پیدا ہونے والا ہے۔ کانگریس نے مطالبہ کیا ہے کہ پولیس ان کے خلاف ایف آئی آر درج کرے اور قانونی کارروائی کرے۔

اس کے علاوہ کانگریس لیڈر علی عمران رمز عرف وکٹر نے بھی شمالی دیناج پور کے چکولیا پولیس اسٹیشن میں شوبھندو ادھیکاری کے خلاف ایف آئی آر درج کرائی ہے۔

ترنمول کانگریس کے ایم ایل اے ہمایوں کبیر نے شوبھندو ادھیکاری کے اس بیان پر سخت ردعمل کا اظہار کیا ہے۔ انہوں نے انتباہ دیا، اگر شبھیندو ادھیکاری 72 گھنٹے کے اندر اپنا بیان واپس نہیں لیتے اور مسلم ایم ایل اے سے معافی نہیں مانگتے ہیں تو انہیں اسمبلی میں ہی سبق سکھایا جائے گا۔ میں خود 42 مسلم ایم ایل اے کے ساتھ اس کی قیادت کروں گا۔ میں دیکھنا چاہتا ہوں کہ آیا وہ مرکز کی سیکورٹی فورسز سے ہمارا مقابلہ کرسکتے ہیں یا نہیں۔

---------------

ہندوستان سماچار / عبدالسلام صدیقی