شیئر بازار میں شروعاتی کاروبار کے دوران اتار-چڑھاو، فلیٹ سطح پر سینسیکس اور نفٹی
نئی دہلی، 5 فروری (ہ س)۔ گھریلو شیئر بازار میں آج شروعاتی کاروبار کے دوران اتار۔چڑھاو کی صورت حال برقرار ہے۔ آج کے کاروبار کی شروعات مضبوطی کے ساتھ ہوئی تھی۔ پہلے آدھے گھنٹے کے کاروبار میں خریداری کی حمایت کی وجہ سے شیئر مارکیٹ کی حرکت میں تیزی آئی، لیکن اس کے بعد فروخت کے دباو کی وجہ سے سینسیکس اور نفٹی دونوں انڈیکس گر گئے۔ کاروبار کے پہلے ایک گھنٹے کے بعد سینسیکس 0.16 فیصد کی کمزوری اور نفٹی 0.03 فیصد کی معمولی مضبوطی کے ساتھ کاروبار کر رہے تھے۔
کاروبار کے پہلے ایک گھنٹے کے بعد شیئر مارکیٹ کے بڑے شیئروں میں بی پی سی ایل، انڈس انڈ بینک، ہنڈالکو انڈسٹریز، او این جی سی اور کول انڈیا کے شیئر 2.87 فیصد سے لیکر 1.83 فیصد کے اضافے کے ساتھ کاروبار کر رہے تھے۔ دوسری جانب ایشین پینٹس، ٹائٹن کمپنی، نیسلے، ٹاٹا کنزیومر پروڈکٹس اور برٹانیہ کے شیئر 4.21 فیصد سے لیکر 1.37 فیصد کی کمزوری کے ساتھ کاروبار کرتے نظر آرہے تھے۔
موجودہ کاروبار میں شیئر مارکیٹ میں 2,384 شیئروں میں ایکٹو ٹریڈنگ ہورہی تھی۔ ان میں سے 1,924 شیئر منافع کماکر سبز نشان میں جبکہ 460 شیئر خسارے کے بعد سرخ نشان میں کاروبار کر رہے تھے۔ اسی طرح سینسیکس میں شامل 30 شیئروں میں سے 14 شیئر خریداری کی حمایت کے ساتھ سبز نشان میں برقرار تھے۔ دوسری جانب فروخت کے دباو کے باعث 16 شیئر سرخ نشان میں کاروبار کر رہے تھے۔ جبکہ نفٹی میں شامل 50 شیئروں میں سے 33 شیئر سبز نشان میں اور 17 شیئر سرخ نشان میں تجارت کرتے ہوئے نظر آرہے تھے۔
بی ایس ای کا سینسیکس آج 120.79 پوائنٹس کے اضافے کے ساتھ 78,704.60 پوائنٹس کی سطح پر کھلا۔ کاروبار کے آغاز کے بعد یہ انڈیکس خریداری کی حمایت سے چھلانگ لگا کر 78,735.41 پوائنٹس تک پہنچ گیا، لیکن کاروبار کے پہلے آدھے گھنٹے کے بعد ہی منافع وصولی شروع ہونے کی وجہ سے یہ انڈیکس سرخ نشان پر چلا گیا۔ مارکیٹ میں لگاتار خرید و فروخت کے درمیان پہلے ایک گھنٹے کے کاروبار کے بعد صبح 10.15 بجے سینسیکس 124.29 پوائنٹس کی کمزوری کے ساتھ 78,459.52 پوائنٹس کی سطح پر کاروبار کر رہا تھا۔
سینسیکس کی طرح این ایس ای کے نفٹی نے بھی آج 62.50 پوائنٹس چھلانگ لگاکر 23,801.75 پوائنٹس پر تجارت شروع کی۔ مارکیٹ کھلنے کے بعد خریداری کے سہارے یہ انڈیکس چھلانگ لگا کر 23,807.30 تک پہنچ گیا لیکن اس کے بعد فروخت کے دباو کی وجہ سے یہ انڈیکس بھی سرخ نشان میں ڈوب گیا۔ مارکیٹ میں لگاتار خرید و فروخت کے درمیان ابتدائی 1 گھنٹے کے کاروبار کے بعد صبح 10.15 بجے نفٹی 7.75 پوائنٹس کے معمولی اضافے کے ساتھ 23,747 پوائنٹس کی سطح پر کاروبار کر رہا تھا۔
ہندوستھان سماچار
---------------
ہندوستان سماچار / انظر حسن
