جموں, 5 فروری (ہ س)۔

بی جے پی کے سینئر رہنما اور ایم ایل اے پاڈر-ناگسینی سنیل شرما نے نیشنل کانفرنس پر جموں و کشمیر میں امن و امان خراب کرنے کا الزام عائد کیا ہے۔ انہوں نے این سی کو 1931 کے واقعات، 1989 میں کشمیری پنڈتوں کی ہجرت اور حالیہ کولگام حملے کا ذمہ دار قرار دیا، جس میں ایک سابق فوجی نامعلوم دہشت گردوں کے ہاتھوں مارا گیا جبکہ اس کی اہلیہ اور بھتیجی زخمی ہوئیں۔سری نگر میں فوج کے 92 بیس اسپتال کے باہر نامہ نگاروں سے بات کرتے ہوئے سنیل شرما نے کہا کہ ان کا دورہ زخمی خواتین کی خیریت دریافت کرنے کے لیے تھا، جو جنوبی کشمیر کے بیہی باغ علاقے میں دہشت گردانہ حملے میں شدید زخمی ہوئی تھیں۔انہوں نے کہا کہ میں بی جے پی جموں و کشمیر کے صدر ست شرما، سابق صدر رویندر رینا اور دیگر رہنماؤں کے ساتھ کولگام جا رہا ہوں تاکہ سابق فوجی منظور وگے کے اہل خانہ کے ساتھ اظہارِ یکجہتی کر سکوں، جو دہشت گردانہ حملے میں اپنی جان گنوا بیٹھے۔ پارٹی ہائی کمان کی ہدایت پر ہم یہاں پہنچے ہیں تاکہ متاثرہ خاندان کی ہر ممکن مدد کر سکیں۔دریں اثنا، بی جے پی جموں و کشمیر کے صدر ست شرما نے کولگام حملے کی شدید مذمت کی اور بعض عناصر پر خطے میں بدامنی پھیلانے کا الزام عائد کیا۔انہوں نے خبردار کیا کہ کچھ لوگ پاکستان کے اشارے پر یہاں کے امن کو خراب کرنے کی کوشش کر رہے ہیں، لیکن انہیں بخشا نہیں جائے گا۔ ہمارے شہداء کی قربانی رائیگاں نہیں جائے گی، ان کی بہادری ہمیشہ یاد رکھی جائے گی اور انصاف ضرور ہوگا۔

ہندوستھان سماچار

---------------

ہندوستان سماچار / محمد اصغر