نئی دہلی، 11 فروری (ہ س)۔ مرکزی وزیر خزانہ نرملا سیتارمن نے منگل کو لوک سبھا میں کہا کہ حکومت 26-2025 میں تقریباً پورے قرضے کو سرمایہ کے اخراجات کی مالی اعانت کے لیے استعمال کرنے کی کوشش کر رہی ہے۔ انہوں نے کہا کہ 10.3 کروڑ سے زیادہ مستفیدین 503 روپے میں ایل پی جی سلنڈر حاصل کر رہے ہیں۔

لوک سبھا میں مرکزی بجٹ 26-2025 پر بحث کا جواب دیتے ہوئے، وزیر خزانہ نے کہا کہ بجٹ کا فوکس غریبوں، نوجوانوں، کسانوں اور خواتین پر ہے۔ انہوں نے کہا کہ مالی سال 26-2025 میں موثر سرمایہ خرچ 15.48 لاکھ کروڑ روپے ہے جو کہ مجموعی گھریلو پیداوار (جی ڈی پی) کا 4.3 فیصد ہے۔ آئندہ مالی سال کے لیے مالیاتی خسارے کا ہدف جی ڈی پی کا 4.4 فیصد ہے۔

سیتا رمن نے کہا کہ 2014 سے پہلے 45 فیصد گھرانوں کے پاس ایل پی جی کنکشن یا صاف ایندھن نہیں تھا۔ لیکن اب، تقریباً 32 کروڑ گھرانوں، یعنی تقریباً 100 فیصد گھرانوں کو صاف کھانا پکانے کا ایندھن دستیاب ہے۔ انہوں نے کہا کہ 10.3 کروڑ سے زیادہ مستفیدین 503 روپے میں ایل پی جی سلنڈر حاصل کر رہے ہیں۔ زراعت، مائیکرو، چھوٹے اور درمیانے درجے کے کاروباری اداروں ، سرمایہ کاری اور برآمدات کو ترقی کا انجن بنا کر گاؤں میں خوشحالی لانے پر توجہ مرکوز کی گئی ہے۔

وزیر خزانہ نے کہا کہ حکومت آنے والے مالی سال 26-2025 میں موثر سرمائے کے اخراجات کی مالی اعانت کے لیے ادھار لیے گئے وسائل کا تقریباً 99 فیصد استعمال کرنے کا ارادہ رکھتی ہے۔ اس طرح مالی سال 26-2025 میں شعبہ جاتی اخراجات میں زراعت کو 1.71 لاکھ کروڑ روپے، دیہی ترقی کو 2.67 لاکھ کروڑ روپے، شہری ترقی اور ٹرانسپورٹ کو 6.45 لاکھ کروڑ روپے، صحت اور تعلیم کو 2.27 لاکھ کروڑ روپے، دفاع کو (جس میں 2 لاکھ 9 کروڑ روپے دفاعی پنشن شامل نہیں ہوگی) ملے گی۔ انہوں نے کہا کہ وہ اس حقیقت کو اجاگر کرنا چاہتی ہیں کہ کسی بھی کیپٹل ایکسپینڈیچر اکاؤنٹ میں رقم دینے سے انکار نہیں کیا جا رہا ہے۔

انہوں نے کہا کہ بھارت سنچار نگم لمیٹڈ (بی ایس این ایل) کو 2019 میں 69000 کروڑ روپے اور 2022 میں 1.64 لاکھ کروڑ روپے کا پیکیج دیا گیا تھا۔ اسی طرح 2023 میں 89047 کروڑ روپے کی منظوری دی گئی۔ جسکی وجہ سے بی ایس این ایل کو ملک بھر میں 50,000 4G سائٹس قائم کرنے کے قابل بنا ہے۔

ہندوستھان سماچار

ہندوستان سماچار / عبدالواحد