جموں, 29 دسمبر (ہ س)۔

ضلع کشتواڑ میں سوشل میڈیا پر ایک ویڈیو اپ لوڈ کر کے واقعے کو فرقہ وارانہ رنگ دینے اور امن و امان میں خلل ڈالنے کی کوشش کرنے پر پولیس نے ایک شخص کو حراست میں لے لیا ہے۔پولیس کی جانب سے جاری بیان میں کہا گیا ہے کہ گزشتہ روز ایک برادری کے افراد جنگل سے لکڑیاں لا رہے تھے، اسی دوران ایک لکڑی کا گٹھا پھسل کر مدرسہ کے قریب جا رکا، جس کے بعد دو برادریوں کے درمیان تکرار ہو گئی۔ یہ واقعہ پولیس پوسٹ پدیارنہ کے دائرہ اختیار میں پیش آیا، جو بعد ازاں دونوں جانب سے پتھراؤ میں تبدیل ہو گیا، جس میں چند افراد کو معمولی چوٹیں آئیں۔

پولیس کے مطابق اس معاملے میں کشتواڑ پولیس نے فوری طور پر نوٹس لیتے ہوئے ایف آئی آر نمبر 262/25 درج کی، جو بی این ایس کی دفعات 125، 125(اے) اور 191(2) کے تحت ہے، جبکہ تحقیقات کا آغاز کر دیا گیا ہے۔

ادھر آج کشتواڑ کے ایک شخص نے سوشل میڈیا پر واقعے کی ویڈیو اپ لوڈ کرتے ہوئے اسے ایک مذہبی مقام پر حملہ قرار دیا اور فرقہ وارانہ رنگ دینے کی کوشش کی، جس سے عوامی امن و امان متاثر ہوا۔ اس سلسلے میں پولیس اسٹیشن کشتواڑ میں بی این ایس کی دفعہ 353 کے تحت ایف آئی آر نمبر 263/25 درج کر کے مذکورہ شخص کو حراست میں لے لیا گیا ہے۔

پولیس نے عوام سے اپیل کی ہے کہ وہ سوشل میڈیا اور دیگر ڈیجیٹل پلیٹ فارمز کے استعمال میں مکمل احتیاط اور ذمہ داری کا مظاہرہ کریں۔ بیان میں کہا گیا ہے کہ اس طرح کے کسی بھی عمل میں ملوث پائے جانے والوں کے خلاف قانون کے مطابق سخت کارروائی کی جائے گی۔

ہندوستھان سماچار

---------------

ہندوستان سماچار / محمد اصغر